Басейн у Браславе закрылі праз тры дні пасля пачатку працы

• 13.11.2026, 23:21

Урачыстае адкрыццё аб’екта за 10 мільёнаў рублёў аказалася паказухай.

Новы фізкультурна-аздараўленчы комплекс «Драйв» у Браславе, які ўрачыста адкрылі напярэдадні 7 лістапада, прыпыніў працу басейна ўжо праз некалькі дзён, заўважыла выданне BG.Media.

11 лістапада адміністрацыя паведаміла пра часовае закрыццё басейна ў сувязі з «планавымі кантрольнымі мерапрыемствамі па наладцы сістэмы вентыляцыі». Дату аднаўлення працы пакуль не назвалі.

Комплекс пачаў прымаць наведвальнікаў 8 лістапада. На яго будаўніцтва патрацілі каля 10 мільёнаў рублёў. Трэць гэтай сумы паступіла з раённага бюджэту, астатнія сродкі — з абласнога.

У «Драйве» абсталявалі 25-метровы басейн з трыма дарожкамі, асобную зону для маленькіх дзяцей, трэнажорную і фітнес-залу, сауну і хамам. Комплекс разлічаны на адначасовае наведванне 70 чалавек.

Паводле папярэдніх разлікаў, штодня фізкультурна-аздараўленчы комплекс павінны былі наведваць больш за 600 жыхароў і гасцей Браслаўскага раёна. У басейне планавалі праводзіць да 12 сеансаў у дзень.

На ўрачыстым адкрыцці старшыня Палаты прадстаўнікоў Ігар Сяргеенка назваў комплекс прыкладам клопату пра жыхароў невялікіх гарадоў і выказаў упэўненасць, што ён стане месцам прыцягнення людзей рознага ўзросту.

Падобная сітуацыя нядаўна адбылася і ў Пінску. Напярэдадні 3 ліпеня там урачыста адкрылі басейн сярэдняй школы № 14 пасля капітальнага рамонту. У паведамленнях пра адкрыццё расказвалі пра абноўленыя інжынерныя сеткі, вентыляцыю, раздзявальні і рамонт чашы басейна. Аднак пазней высветлілася, што летам наведваць яго нельга: журналісты мясцовага тэлебачання адказалі жыхарам, што басейн пачне працаваць толькі ў кастрычніку.