ЗША пералічылі Венесуэле больш за $12 млрд даходаў ад продажу нафты
- 14.11.2026, 9:12
Вашынгтон кіруе гэтымі даходамі праз спецыяльны механізм, створаны пасля затрымання Мадуры.
Дзярждэпартамент ЗША паведаміў, што за першыя дзевяць месяцаў 2026 года праз створаны Вашынгтонам фінансавы механізм прайшло больш за 12 мільярдаў долараў даходаў Венесуэлы ад продажу нафты і іншых прыродных рэсурсаў. Амаль усе гэтыя сродкі былі пералічаныя венесуэльскаму боку, перадае «Голас Амерыкі».
Вашынгтон кіруе гэтымі даходамі праз спецыяльны механізм, створаны пасля затрымання Нікаласа Мадуры у студзені 2026 года. Кантроль над сродкамі з'яўляецца часткай пагаднення з пераходным урадам Венесуэлы на чале з выконваючай абавязкі прэзідэнта Дэльсі Радрыгес.
Паводле ўмоў дагавора, даходы ад продажу нафты і іншых прыродных рэсурсаў Венесуэлы паступаюць на рахунак, які знаходзіцца пад кіраваннем Міністэрства фінансаў ЗША. Яно таксама зацвярджае парадак выкарыстання сродкаў.
Паводле гэтай схемы, грошы размяшчаюцца на рахунку, які знаходзіцца пад кантролем ЗША. Затым цэнтральны банк Венесуэлы падае запыт на іх пераказ, пасля чаго амерыканскія ўлады прымаюць рашэнне аб ухваленні або адхіленні выплаты.
Як адзначаецца ў дакладзе Дзярждэпартамента, механізм закліканы забяспечыць празрыстасць, падсправаздачнасць і адказнае кіраванне даходамі ад прыродных рэсурсаў Венесуэлы.
Выступаючы перад журналістамі на сустрэчы міністраў замежных спраў краін G7 у Парыжы, дзяржсакратар ЗША Марка Рубіо заявіў, што палітычны пераходны працэс у Венесуэле паспяхова прасоўваецца. Рубіо выказаў надзею, што ключавыя тэрміны фарміравання новых судовых і выбарчых інстытутаў будуць выкананыя.
«Лічу, што мы дасягаем добрага прагрэсу. Трэба толькі працягваць сачыць за працэсам і забяспечыць выкананне ўсталяваных тэрмінаў», — сказаў дзяржсакратар.
Паводле яго слоў, план прадугледжвае прызначэнне новых суддзяў Вярхоўнага суда Венесуэлы да сярэдзіны снежня, пасля чаго павінен быць сфармаваны новы Нацыянальны выбарчы савет краіны.
Рубіо таксама падкрэсліў важнасць пашырэння міжнародных сувязяў Венесуэлы.
«Мы лічым, што Венесуэла можа шмат што прапанаваць. Чым шчыльней яна ўзаемадзейнічае са светам па-за сувязямі з Расіяй, Кітаем і Іранам, тым больш магчымасцяў для прагрэсу ў эканамічным і грамадскім аднаўленні краіны», — заявіў ён.