ЗСУ ўдарылі па нафтабазе «Самара» і аэрадроме «Ліпецк-2»

• 14.11.2026, 16:38

Расіянам учынілі «гарачую ноч».

У пятніцу, 13 лістапада, Сілы абароны атакавалі лінейную вытворча-дыспетчарскую станцыю «Самара» паблізу пасёлка Прасвет у Самарскай вобласці. Гэта адзін з ключавых вузлоў расійскай нафтавай сістэмы. Там пачаўся пажар, гараць некалькі рэзервуараў з нафтай. Акрамя таго, пацверджаныя вынікі ўдару па ваенным аэрадроме «Ліпецк-2». Пра гэта ў суботу, 14 лістапада, паведаміў Генштаб ЗСУ.

У Генштабе патлумачылі, што на станцыю «Самара» па магістральных нафтаправодах з Татарстана, Заходняй Сібіры і іншых рэгіёнаў Расіі паступае нафта. Тут яе змешваюць і фармуюць экспартны гатунак Urals, на які прыпадае да паловы ўсяго нафтавага экспарту краіны.

На аэрадроме «Ліпецк-2» у Ліпецкай вобласці, дзе базуецца расійская ваенная авіяцыя, паводле дадзеных вайскоўцаў, паражаныя ангар са спецтэхнікай для абслугоўвання самалётаў, рэзервуар з авіяпалівам і цэнтральны камандна-дыспетчарскі пункт.

У ноч на 13 лістапада Сілы абароны таксама паразілі Валгаградскі НПЗ кампаніі «Лукойл». Паводле інфармацыі Генштаба, там пашкоджаныя шэсць рэзервуараў і ўзнік пажар. Прадпрыемства магутнасцю каля 15 млн тон нафты ў год выпускае бензін, дызельнае і авіяцыйнае паліва, у тым ліку для расійскай арміі.

За два дні да гэтага СБУ разам з іншымі падраздзяленнямі Сіл абароны атакавала порт «Усць-Луга» ў Ленінградскай вобласці. Там былі пашкоджаныя рэзервуары з нафтапрадуктамі, устаноўка гідракрекінгу і прычал для адгрузкі на танкеры.