Асуджаныя за забойства Нямцова вызваленыя і жывуць у Чачні
- 16.11.2026, 14:08
Паводле дакументаў яны лічацца ўдзельнікамі вайны супраць Украіны.
Трое асуджаных у справе аб забойстве расійскага апазіцыйнага палітыка Барыса Нямцова маглі выйсці на волю задоўга да заканчэння прызначаных ім тэрмінаў. Пра гэта ў панядзелак, 16 лістапада, паведаміла расследавальнае выданне «Праект». Паводле дадзеных журналістаў, усе трае цяпер знаходзяцца ў Чачні, хаця фармальна лічацца ўдзельнікамі поўнамаштабнай вайны Расіі супраць Украіны.
Падставай для расследавання стала паведамленне, якое ўлетку 2026 года атрымала дачка палітыка Жанна Нямцова. Крыніца паведаміла ёй, што асуджаныя Заур Дадаеў і браты Губашавы на волі і жывуць у Грозным. Самастойна праверыць гэтыя звесткі журналістам не ўдалося, але, паводле іх слоў, ускосныя даныя ўказваюць на такую магчымасць. Расійскія ўлады на момант выхаду расследавання інфармацыю не каментавалі.
Паводле інфармацыі «Праекта», Заур Дадаеў, якога суд прызнаў выканаўцам забойства і прызначыў 20 гадоў, а таксама яго саўдзельнікі, браты Анзор і Шадід Губашавы, якія атрымалі адпаведна 19 і 16 гадоў, заключылі кантракты з Мінабароны РФ і на гэтай падставе выйшлі з калоній. На фронт яны не паехалі, а адправіліся ў Чачню, дзе, паводле слоў крыніцы, жывуць «ціхім жыццём»: гэта было ўмовай вызвалення, «каб ніхто не даведаўся, што яны на волі».
З уцечак даных «Праект» даведаўся, што Дадаеў, які адбываў пакаранне ў ІК-3 у Іркуцку, выбыў адтуль «у сувязі з этапаваннем», але звестак пра яго прыбыццё ў іншую калонію не знайшлося. Раней «Новая газета Еўропа» паведамляла пра вызваленне яшчэ аднаго асуджанага па гэтай справе, Цемірлана Эскерханава: ён атрымаў памілаванне, падпісаўшы кантракт з Мінабароны, але замест фронту апынуўся ў акупаваным Марыупалі. Адзіны, хто выйшаў на волю, цалкам адбыўшы тэрмін, гэта Хамзат Бахаеў, піша The Insider.
Забойства Барыса Нямцова
Барыса Нямцова забілі ўвечары 27 лютага 2015 года: у яго стралялі ў спіну на Вялікім Маскварэцкім мосце, у непасрэднай блізкасці ад Крэмля. У ліпені 2017 года Маскоўскі акружны ваенны суд прысудзіў абвешчаных выканаўцамі Заура Дадаева, Анзора і Шадзіда Губашавых, Цемірлана Эскерханава і Хамзата Бахаева да тэрмінаў ад 11 да 20 гадоў. Арганізатары і заказчыкі злачынства да гэтага часу афіцыйна не ўстаноўлены.
Як раней пісаў The Insider, група кілераў ФСБ сачыла за Нямцовым на працягу апошніх месяцаў яго жыцця. Сачэнне пачалося адразу пасля таго, як ён стаў актыўна лабіраваць пашырэнне санкцый супраць сяброў прэзідэнта Расіі Уладзіміра Пуціна, і спынілася 21 лютага, за некалькі дзён да забойства каля сцен Крэмля.