BE RU EN

Рыдлі Скот і Глен Клоўз атрымалі ганаровыя прэміі «Оскар»

  • 16.11.2026, 19:12

За ўклад у кінамастацтва.

Рэжысёр Рыдлі Скот і актрыса Глен Клоўз атрымалі ганаровыя прэміі «Оскар» за ўклад у кінамастацтва, паведамляе Reuters.

Клоўз восем разоў намінавалі на прэмію, аднак раней яна ні разу не станавілася яе лаўрэаткай. Скот заявіў, што ганарыцца тым, што можа прыняць узнагароду, але прысвячае яе таксама свайму памерламу брату Тоні Скоту, які таксама быў кінарэжысёрам.

Паводле слоў рэжысёра, яго брат заслужыў бы такое прызнанне сваёй працай. Ганаровай узнагароды таксама ўдастоілі аніматара Флойда Нормана. Прадусары Крысцін Вашон і Памэла Кофлер атрымалі прэмію імя Ірвінга Тальберга.

У нядзелю, 15 лістапада, у Лос-Анджэлесе адбылася 17‑я цырымонія ўручэння ганаровай прэміі «Оскар» за выбітныя заслугі ў кінематаграфе (Governors Awards). Цырымонію наведалі Юра Барысаў, Шарліз Тэрон, Зэндэя, Цімаце Шаламе і іншыя зоркі першай велічыні.

Ганаровы «Оскар» — узнагарода Амерыканскай кінаакадэміі за выбітныя дасягненні на працягу кар'еры, уклад у кінамастацтва або асаблівыя заслугі перад акадэміяй. У адрозненне ад конкурсных узнагарод, яго прысуджаюць не за працу ў канкрэтным фільме: лаўрэатаў выбірае савет кіраўнікоў Кінаакадэміі. Статуэткі ўручаюць асобна ад асноўнай цырымоніі «Оскара» — на Governors Awards.

Апошнія навіны