BE RU EN

Нямецкія вучоныя: Вароны прымаюць рашэнні ўдвая хутчэй, чым людзі

  • 17.11.2026, 14:07

Вынікі новага даследавання.

Вароны прымаюць рашэнні імгненна — прыкладна ўдвая хутчэй, чым людзі, высветлілі вучоныя з Цюбінгенскага ўніверсітэта ў Германіі.

Гэтыя птушкі славяцца сваім розумам — яны выкарыстоўваюць інструменты, запамінаюць чалавечыя твары, умеюць лічыць да чатырох і разумеюць асновы геаметрыі. Цяпер новае даследаванне паказала, што вароны здольныя і неверагодна хутка прымаць рашэнні на падставе зрокавай інфармацыі, паведамляе «Еўрапульс».

Даследчыкі правялі эксперымент з двума варонамі па імёнах Іггі і Лемі. Кожную птушку пасадзілі перад сэнсарным экранам, у цэнтры якога знаходзілася група кропак. Частка кропак пачынала рухацца ў адным накірунку — улева або ўправа, а астатнія перамяшчаліся хаатычна, адцягваючы варону. Як толькі кропкі прыходзілі ў рух, птушка мусіла як мага хутчэй дзёбнуць экран, паказаўшы, у які бок рухаюцца кропкі з агульным накірункам. За правільны адказ яна атрымлівала ласунак.

Іггі і Лемі выканалі заданне тысячы разоў. Каб прыняць правільнае рашэнне і паведаміць пра яго, варонам у сярэднім патрабавалася 235 мілісекунд — каля адной пятай секунды. Гэта прыкладна ўдвая менш часу, чым патрабуецца малпам і людзям, каб выканаць падобныя заданні з такой жа дакладнасцю.

Чаму ж вароны так хутка прымаюць рашэнні? Магчыма, гэта звязана з іх ладам жыцця. Зрок дапамагае птушкам выконваць складаныя манеўры ў палёце, хутка і дакладна падхопліваць ежу і заўважаць драпежнікаў. Іншымі словамі, патрэба спраўляцца з гэтымі задачамі магла прывесці да таго, што ў ходзе эвалюцыі вароны навучыліся хутка апрацоўваць зрокавую інфармацыю і рэагаваць імгненным рухам.

Ці валодаюць такой жа хуткасцю мыслення і рэакцыі іншыя птушкі, вучоныя пакуль не высветлілі. Яны не выключаюць, што падобныя здольнасці могуць мець танімбарскія какаду, гракі, перасмешнікі і папугаі жако.

Апошнія навіны