Бетонны міф Пуціна аказаўся ўразлівым
- Аляксандр Роднянскі
- 17.11.2026, 16:09
Удар нанесены па ўсёй ідэалагічнай канструкцыі Крэмля.
Сёння ўначы Крымскі мост зноў падвергся атацы ЗСУ. Паводле папярэдніх паведамленняў, у ваду абрынуліся аўтамабільная арка і прылеглы ўчастак дарожнага палатна. Рух спынены. Дакладны маштаб разбурэнняў яшчэ належыць вызначыць.
Я рэдка пішу пра ваенныя аперацыі і не буду ацэньваць ужытую зброю і тактыку. Але ў гэтай гісторыі ёсць іншае вымярэнне — палітычнае. Дастаткова згадаць, якое месца Крымскі мост займаў у расійскай дзяржаўнай міфалогіі.
Яго будаўніцтва павінна было зрабіць анексію Крыму канчатковай. Тэрыторыю, захопленую ў парушэнне міжнароднага права, злучалі з Расіяй шматкіламетровай дарогай. У прапагандысцкай логіцы бетон і сталь станавіліся больш пераканаўчымі за дыпламатычныя заявы: мост існуе, па ім едуць машыны і цягнікі, адпаведна, пытанне аб прыналежнасці паўвострава лічыцца закрытым.
Асаблівае значэнне меў асабісты ўдзел Пуціна. У маі 2018 года ён адкрываў аўтамабільную частку за рулём КАМАЗа. У снежні 2019-га ўдзельнічаў у адкрыцці чыгуначных зносін. Мост стаў матэрыяльным помнікам яго палітыцы.
Вакол яго стварылі цэлую культурную інфраструктуру. У 2018 годзе выйшла бяздарная рамантычная камедыя Ціграна Кеасаяна паводле сцэнарыя Маргарыты Сіманян — «Крымскі мост. Зроблена з любоўю!».
З'явіліся песні, кліпы, паштовыя маркі. «Любэ» і «Фабрыка» выпусцілі кліп «Па мосце». Выяву моста чаканілі на манетах і друкавалі на марках. У 2017 годзе ў Расіі быў арганізаваны конкурс твораў, прысвечаных будаўніцтву Крымскага моста. У журы ўваходзілі Ігар Крутой і Ігар Матвіенка. Перамагла песня вадзіцеля з Іванава Леаніда Чарнышова. Яе выконваў Алег Газманаў, які даў канцэрт для будаўнікоў моста.
Вось так і працуе прапаганда.
Таму ўдар ЗСУ і мае такое асаблівае значэнне. Спаруда, закліканая сведчыць пра неабарачальнасць расійскага кантролю над Крымам, аказваецца ўразлівай.
Пра ваенныя наступствы гаварыць рана, а вось прапагандысцкія — відавочныя.
Расійская ўлада зрабіла мост доказам уласнай сілы, гістарычнай праваты і канчатковасці сваіх рашэнняў. Менавіта таму любое сур'ёзнае разбурэнне моста непазбежна становіцца выпрабаваннем для ўсёй гэтай канструкцыі ідэалагічных уяўленняў.
Аляксандр Роднянскі, Telegram