У Румыніі адбыўся землятрус
- 18.11.2026, 9:15
Падземныя штуршкі адчулі нават ва Украіне.
У ноч на сераду, 18 лістапада, у Румыніі адбыўся землятрус магнітудай 5,3 – такія адносяць да ўмераных. Пры гэтым падземныя штуршкі адчуваліся і ва Украіне, у прыватнасці ў Адэскай вобласці.
Пра гэта паведамляе Еўрапейска-Сярэдземнаморскі сейсмалагічны цэнтр. У сетцы ўкраінцы з розных рэгіёнаў дзяліліся, што таксама адчулі землятрус.
Падземныя штуршкі зафіксавалі, у прыватнасці, у Адэсе і Ізмаіле, перадае «Суспільне». Пра іх таксама паведамлялі ў Кіеўскай, Палтаўскай, Вінніцкай, Кіраваградскай, Мікалаеўскай, Чаркаскай і Дняпрапятроўскай абласцях.
Эпіцэнтр землятрусу знаходзіўся на глыбіні 140 км, за 13 км на захад ад вёскі Нерэжу. Ён адбыўся а 02:48 па мясцовым (і ўкраінскім) часе.
Паводле даных Галоўнага цэнтра спецыяльнага кантролю, які ажыццяўляе маніторынг геафізічных з’яў на тэрыторыі Украіны і Зямнога шара, быў зафіксаваны землятрус з тэрыторыі Румыніі магнітудай 5,6 (па шкале Рыхтэра), на глыбіні 134 км.
«Паводле класіфікацыі землятрусаў адносіцца да моцна ўмераных. Землятрус адчуваўся ў многіх населеных пунктах на тэрыторыі Украіны з інтэнсіўнасцю 4–5 балаў (па шкале МСК-64)», – гаворыцца ў паведамленні.
Землятрус закрануў не толькі Украіну, але і іншыя краіны, што мяжуюць з Румыніяй.