BE RU EN

Politico: Украіна атрымае магутную падтрымку насуперак пазіцыі Трампа

  • 22.11.2026, 21:12

У Кангрэсе рыхтуюць новы шматмільярдны пакет дапамогі Кіеву.

Прэзідэнт ЗША Дональд Трамп падштурхоўвае Еўропу да таго, каб яна перастала засяроджвацца на ваеннай дапамозе Украіне. Аднак ні НАТА, ні дэмакраты ў Кангрэсе ЗША, якія толькі што атрымалі новыя паўнамоцтвы, яго не слухаюць.

Наадварот — саюзнікі Украіны і ўплывовыя сенатары ЗША ўжо разглядаюць цэлы спектр розных магчымасцяў, як даць Кіеву рычагі ў перамовах і як супрацьстаяць ціску з боку Трампа, піша Politico.

Так, вядучыя заканадаўцы-дэмакраты, якіх таксама падтрымлівае адзін з самых уплывовых праўкраінскіх рэспубліканцаў, настаюць: ужо на пачатку наступнага года яны будуць спрабаваць правесці шматмільярдны пакет ваеннай дапамогі Украіне. І тым самым яны фактычна кідаюць Трампу выклік — «накладвайце вета, калі пасмееце».

Што рыхтуюць партнёры Украіны

Еўрапейскія краіны тым часам праз сумесныя партнёрствы актыўна працуюць над пастаўкамі Кіеву бранятэхнікі і сістэм супрацьпаветранай абароны. А саюзнікі па НАТА заклікаюць Пентагон перадаць Украіне старыя знішчальнікі, якія могуць перахопліваць расійскія рэактыўныя беспілотнікі.

Дэмакраты, якія атрымалі кантроль над Кангрэсам пасля лістападаўскіх прамежкавых выбараў, у гэтыя выхадныя на міжнародным форуме па бяспецы ў Галіфаксе ясна далі зразумець: калі Трамп хоча «задушыць» Украіну, то для гэтага яму спачатку давядзецца прайсці праз іх.

«У нас з’явілася значна больш інструментаў», — заявіў сенатар Тым Кэйн (дэмакрат ад Вірджыніі), які ўзначальвае двухпартыйную дэлегацыю Кангрэса ў Галіфаксе. «Цяпер рэспубліканцам ад нас, дэмакратаў, патрэбна значна больш, чым у папярэднія два гады. І мы дакладна не дазволім ім замарыць галодам нашага саюзніка. Мы гэтага не дапусцім», — падкрэсліў ён.

Трамп пасля нядаўняй сустрэчы з крэмлёўскім дыктатарам Уладзімірам Пуціным і кітайскім лідарам Сі Цзіньпінам адзначыў, што хоча пакласці канец вайне і нават заявіў, што ёсць «сапраўды добры шанец» дасягнуць пагаднення.

Дапамога Украіне зноў на парадку дня

Сенатар Кэйн разам з Эндзі Кімам (дэмакрат ад Нью-Джэрсі) заявілі, што наступны склад Кангрэса ўжо рыхтуе для Украіны новы шматмільярдны пакет дапамогі. У яго ўвойдзе як зброя, так і гуманітарная падтрымка.

План, як патлумачыў сенатар Кім, заключаецца ў тым, каб сабраць дастатковую двухпартыйную падтрымку. Гэта дазволіць альбо прымусіць Трампа скарыстацца ветам, альбо нават пераадолець ягонае вета.

«Ні адзін сенатар, з якім я асабіста меў зносіны за апошнія дзве тыдні, — ні сярод рэспубліканцаў, ні сярод дэмакратаў, — не сказаў мне, што будзе супраць гэтага кроку», — заявіў Кім у інтэрв’ю на палях форуму ў Галіфаксе. «У нас цалкам можа набрацца большасць, каб пераадолець вета. Улічваючы, колькі галасоў мы нядаўна атрымалі ў Сенаце і Палаце прадстаўнікоў за пакет санкцый супраць Расіі», — дадаў ён.

Праўда, заканадаўцы, якія прыбылі ў Галіфакс, не чакаюць вяртання эпохі вялікіх пакетаў дапамогі Украіне часоў прэзідэнта Байдэна.

Замест гэтага, паводле слоў Кэйна, Кангрэс цяпер актыўна кантактуе з саюзнікамі — у прыватнасці з Польшчай і Германіяй — наконт сумесных партнёрстваў для паставак зброі Кіеву. Прычым грошы на гэта пойдуць не толькі з бюджэтаў, але і ад прыватных інвестараў.

«Вы яшчэ ўбачыце, якія істотныя інвестыцыі ва Украіну з’явяцца ў нашых абаронных і фінансавых законапраектах», — падкрэсліў Кэйн.

Як абмяжоўваюць прастору для манеўру Трампа

Сенатар-дэмакрат Крыс Кунс, які павінен узначаліць сенатскі камітэт па міжнародных адносінах, таксама заявіў, што разглядае магчымасць распачаць расследаванне.

Ідзе гаворка пра сітуацыю, калі для Украіны абмежавалі хуткасць для спадарожнікавых тэрміналаў Starshield вытворчасці SpaceX Ілона Маска — пры тым, што яны знаходзяцца менавіта пад кіраваннем Пентагона. Адказнасць за гэты інцыдэнт пакуль ніхто не ўзяў. А сам Кіеў адзначыў, што гэта ўжо дазволіла расійскім ударам прарываць украінскую супрацьпаветраную абарону.

«Гэта сапраўдная нізасць, што ў нас сёння прэзідэнт, які не бачыць гэтую сітуацыю настолькі выразна, як бачаць яе самі амерыканцы», — заявіў Кунс. «Пуцін наогул не папулярны ў Амерыцы. І толькі адзін чалавек, падаецца, па-сапраўднаму хоча з ім сябраваць», — падкрэсліў ён.

Сенатар Кім дадаў, што дэмакраты таксама маюць намер «звузіць прастору для манеўру», якая дагэтуль дазваляла Трампу абыходзіць новыя санкцыі і тарыфы Кангрэса супраць Расіі. Акрамя таго, яны плануюць увесці асобныя санкцыі супраць расійскага «ценявога флоту» — старых нафтавых танкераў, якія Крэмль выкарыстоўвае, каб абыходзіць заходнія экспартныя забароны.

А яшчэ, паводле слоў сенатара Кэйна, дэмакраты ўжо шукаюць механізмы, якія дапамогуць перашкодзіць Беламу дому затрымліваць або адмяняць ужо ўхваленую Кангрэсам дапамогу Украіне — менавіта ў кантэксце спробаў Трампа завяршыць вайну.

«Нам трэба прадумаць не толькі тое, як менавіта мы пакажам нашу прыхільнасць рэсурсам для Украіны. Нам таксама трэба пераканацца, што Пентагон не зможа ўсё гэта сабатаваць», — падсумаваў Кэйн.

Два трэкі, па якіх рухаецца Еўропа

Паведамляецца, што еўрапейскія ўрады таксама актыўна кантактуюць з Пентагонам наконт пастаўкі Украіне знішчальнікаў F-16, якія цяпер лічацца за Нацыянальнай гвардыяй ЗША. Іх плануюць выкарыстоўваць менавіта для перахопу высокахуткасных расійскіх рэактыўных беспілотнікаў. Пра гэта заявіў міністр па ўзбраеннях, закупках і персанале Нідэрландаў Дерк Босвейк.

І пакуль еўрапейцы вядуць перамовы з Пентагонам і набываюць ракеты ў Lockheed Martin і Raytheon, Нідэрланды адначасова падтрымліваюць ініцыятыву адразу пяці еўрапейскіх абаронных кампаній. Ідзе гаворка пра сумесную распрацоўку перахопніка балістычных ракет сярэдняй далёкасці.

«З аднаго боку, мы нарошчваем уласны патэнцыял. А з другога — купляем тое, што ўжо цяпер ёсць на рынку, — патлумачыў Босвейк у інтэрв’ю. — Нам трэба ісці абодвума шляхамі адначасова. Думаю, гадоў праз два баланс паступова зрушыцца ў бок менавіта еўрапейскага».

Праўда, такія планы пакуль не супакойваюць страхі еўрапейцаў. Многія ў Еўропе ўсё яшчэ баяцца, што ў выніку найбольшым пераможцам у гэтай вайне можа стаць менавіта Расія, адзначаюць журналісты.

«Мы паслядоўна падтрымлівалі Украіну і будзем рабіць гэта столькі, колькі працягнецца вайна, — заявіў дэпутат нямецкага Бундэстага Нільс Шміт. — Мы не хочам, каб Украіна была вымушаная пайсці на пагадненне толькі праз тое, што ёй не хопіць ваенных рэсурсаў для далейшай барацьбы».

Апошнія навіны