У Беларусі анулявалі частку вынікаў рэпетыцыйнага тэставання

• 4.11.2026, 9:54

Стала вядомая прычына.

Пра парушэнні, зафіксаваныя на першым модулі рэпетыцыйнага тэставання, расказалі у Рэспубліканскім інстытуце кантролю ведаў (РІКВ).

Удзельнікі праверачных выпрабаванняў праносілі мабільныя тэлефоны, фатаграфавалі бланкі заданняў, а таксама выносілі з аўдыторый экзаменацыйныя матэрыялы і размяшчалі іх у інтэрнэце і сацыяльных сетках.

«Вынікі тэставання такіх удзельнікаў ануляваныя. З асобамі, датычнымі да размяшчэння матэрыялаў у сетцы Інтэрнэт і сацыяльных сетках, кіраўніцтвам устаноў адукацыі праведзена прафілактычная праца», — паведамілі ў РІКВ.

У пунктах правядзення рэпетыцыйнага тэставання ўзмацнілі кантроль за захаваннем парадку правядзення выпрабаванняў.