У Гомелі падчас прыбірання знайшлі калекцыйны рэвальвер

• 4.11.2026, 10:00

Ён прыдатны для стральбы.

Гамяльчанка падчас прыбірання кватэры знайшла на антрэсолі калекцыйны рэвальвер, паведамілі у Дзяржаўным камітэце судовых экспертыз (ДКСЭ).

Зброю жанчына выявіла сярод старых рэчаў. Яна належала яе памерламу мужу.

Згодна з заключэннем судовай балістычнай экспертызы, знаходка — рэвальвер сістэмы Нагана-Смірнскага ўзору 1926 года.

«Такая зброя выпускалася ў Савецкім Саюзе ў перыяд з 1925 па 1939 гады. Яна ўяўляе сабой вучэбна-трэніровачны варыянт легендарнага рэвальвера сістэмы Нагана, перапрацаваны інжынерам Аляксандрам Смірнскім і прызначаны для стральбы патронамі 5,6×16R кольцавага запальвання. Усяго было выраблена каля 3500 адзінак», — паведамілі ў ДКСЭ.

Паводле заключэння экспертаў, рэвальвер прыдатны для стральбы.