ЗСУ прарваліся наперад адразу ў двух абласцях
- 4.11.2026, 11:14
Аналітыкі ISW раскрылі падрабязнасці.
За апошнія некалькі сутак Сілы абароны Украіны змаглі прасунуцца ў Сумскай і Данецкай абласцях, а таксама сарваць шэраг наступальных аперацый войскаў РФ.
Пра гэта паведамляе Інстытут вывучэння вайны (ISW).
Украінскія войскі нядаўна аднавілі кантроль над пазіцыямі або замацаваліся на поўнач ад Сумаў. Пра гэта сведчаць геалакацыйныя відэазапісы, апублікаваныя 1 лістапада. На іх зафіксаваны расійскі ўдар па ўкраінскай пазіцыі на паўднёвы захад ад Андрыеўкі. Раней расійскія крыніцы заяўлялі, што гэты раён знаходзіцца пад кантролем іх войскаў.
На паўночным усходзе Харкаўскай вобласці і на паўднёвы ўсход ад Вялікага Бурлука расійскія вайскоўцы нядаўна спрабавалі пранікнуць на ўкраінскія пазіцыі. У прыватнасці, геалакацыйнае відэа ад 2 лістапада пацвярджае ўкраінскі ўдар па расійскіх пазіцыях на поўдзень ад Хрыпуноў, размешчаных на паўночны ўсход ад Харкава. Па ацэнцы ISW, яму папярэднічала расійская спроба інфільтрацыі.
2 і 3 лістапада расійскія войскі атакавалі на Купянскім напрамку, аднак не змаглі прасунуцца наперад. У той жа час украінскія абаронцы праводзілі контратакі на поўнач ад Купянска.
Паводле звестак крыніцы, звязанай з Заходняй групоўкай войскаў РФ, 3 лістапада расійскія сілы працягвалі наступ на Бараўскім напрамку. Украінскія вайскоўцы, са свайго боку, контратакавалі на паўночны ўсход ад Баравой. Пры гэтым ISW не выявіў пацвярджэнняў прасоўвання расіян на гэтым участку фронту.
На Ліманскім напрамку 2 і 3 лістапада расійскія войскі таксама працягвалі штурмавыя дзеянні, у прыватнасці ў самым горадзе і паблізу яго. Аднак гэтыя спробы не прынеслі вынікаў, у той час як украінскія сілы контратакоўвалі на паўночны ўсход і паўднёвы ўсход ад Лімана.
Акрамя таго, ISW выявіў новыя доказы таго, што ўкраінскія войскі раней прасунуліся ў Піскуноўцы і Рай-Аляксандраўцы — населеных пунктах адпаведна на паўночны ўсход і паўднёвы ўсход ад Славянска.
Паблізу Канстанцінаўкі і на паўднёвы захад ад Дружкаўкі, уздоўж ракі Казённы Торац, расійскія войскі 2 і 3 лістапада сканцэнтравалі свае атакі. Аднак прасунуцца на гэтых участках ім не ўдалося.
На Дабрапольскім напрамку за гэтыя два дні расіяне правялі менш штурмаў, чым у любы іншы дзень як мінімум з 1 жніўня 2026 года. Паводле інфармацыі Генеральнага штаба ЗСУ, 2 і 3 лістапада акупанты здзейснілі там усяго 13 атак.
3 лістапада ні расійскія, ні ўкраінскія крыніцы не паведамлялі пра наземныя баявыя дзеянні на Новапаўлаўскім напрамку.
На Аляксандраўскім напрамку 2 і 3 лістапада расійскія войскі праводзілі абмежаваныя наступальныя аперацыі, аднак не дасягнулі поспехаў.
На Гуляйпольскім напрамку акупанты таксама працягвалі наступ 2 і 3 лістапада, аднак пацверджаных змяненняў на лініі фронту не зафіксавана. У той жа час 2 лістапада расійскі вайсковы блогер заявіў пра нібыта прасоўванне расійскіх сіл на захад ад пасёлка Горкае, што знаходзіцца захадней Гуляйполя.
На захадзе Запарожскай вобласці расійскія войскі 2 і 3 лістапада працягвалі наступальныя дзеянні, але не дасягнулі пацверджаных тэрытарыяльных поспехаў. На гэтым участку ЗСУ праводзілі контратакі на поўдзень ад Арэхова.