Цяпер пачнецца

• Вадзім Дзянісенка
• 4.11.2026, 13:16

На стале ў Трампа тры варыянты.

Галоўная інтрыга найбліжэйшых дзён такая: ці адважыцца Трамп на працяг ваеннай аперацыі ў Іране і наколькі ён узмоцніць ціск на Украіну ў найбліжэйшыя тыдні?

Параза рэспубліканцаў можа даць старт маштабнай дыскусіі ўнутры партыі пра будучыню. І галоўная бітва — гэта супрацьстаянне паміж рухам MAGA і «старой» партыяй. Ад выніку гэтай бітвы залежыць не толькі кандыдатура наступнага прэзідэнта, але — у радыкальным сцэнары — нават верагоднасць таго, што частка рэспубліканцаў прагаласуе за імпічмент самаму Трампу.

Кангрэс правядзе сваё першае пасяджэнне ў абноўленым складзе 3 студзеня. Трампу цяпер вельмі патрэбная хоць нейкая перамога, каб падысці да гэтага першага пасяджэння з моцнымі козырамі. Справа ў тым, што новы Кангрэс адразу пасля абрання спікера прыступіць да фарміравання следчых камісій, якія будуць рыхтаваць глебу для імпічменту. І Трампу трэба мець магчымасць перабіць гэтую тэму ў інфармацыйнай прасторы, а ў ідэале — паспрабаваць перайсці ў наступ.

Зараз на стале ў Трампа тры варыянты. Адразу скажу, што ўсе тры — сумнеўныя. Першы — хуткая пераможная вайна з Іранам. Другі — прымушэнне Украіны да міру. Трэці — захоп Кубы. Я лічу ўсе гэтыя мэты практычна нерэалістычнымі, але, зыходзячы з логікі Трампа, ён можа пачаць дзейнічаць у гэтых напрамках. Таму нам трэба рыхтавацца да ўзмацнення ціску.

На гэтым фоне з высокай доляй верагоднасці можна меркаваць, што РФ пачне згортваць так званы «трэк Дзмітрыева», разумеючы, што магчымасці Трампа становяцца больш абмежаванымі. А значыць, разлічваць на тое, што Трамп прымусіць Еўропу зняць санкцыі, пакуль не выпадае. Менавіта таму, відаць, еўрапейцам варта рыхтавацца да ўзмацнення гібрыдных атак па ўсім ЕС.

Што да перамоваў, то ў іх няма шанцаў на поспех (Мядзінскі як галоўны перамоўшчык — гэта ўжо дыягназ). Перамоўнае акно магчымасцяў закрылася яшчэ месяц таму. Цяпер гэта ўсяго толькі імітацыя.

Вадзім Дзянісенка, «Фэйсбук»