Дэмакраты параілі людзям Трампа наняць адвакатаў

• 4.11.2026, 14:43

Пачнуцца вялікія расследаванні.

Пасля пераходу кантролю над Палатай прадстаўнікоў і Сенатам да дэмакратаў у ЗША пачынаецца падрыхтоўка да новага этапу парламенцкіх расследаванняў. Будучыя кіраўнікі камітэтаў ужо ў лістападзе змогуць паведамляць грамадзянам і арганізацыям пра магчымы ўдзел у праверках, а пасля пачатку працы новага складу Кангрэса ў студзені атрымаюць права выклікаць сведкаў і патрабаваць прадастаўлення дакументаў, піша CNN (пераклад — сайт Charter97.org).

Неўзабаве пасля абвяшчэння вынікаў выбараў вядучы дэмакрат у Камітэце па наглядзе Палаты прадстаўнікоў Роберт Гарсія апублікаваў у сацсетцы X кароткае паведамленне: «Найміце адвакатаў».

Сенатар Рон Уайдэн, які займае кіраўнічую пасаду ў Фінансавым камітэце Сената, адказаў яшчэ карацей: «Павесткі».

Юрысты ў Вашынгтоне ўжо кансультуюць кліентаў адносна будучых праверак і канкуруюць за права прадстаўляць людзей і кампаніі, якія могуць стаць аб’ектамі расследаванняў. У прыватнасці, юрыдычная фірма Squire Patton Boggs разаслала сваім кліентам пералік магчымых напрамкаў працы будучых камітэтаў.

Аднак магчымасці Кангрэса не бязмежныя. Адміністрацыя прэзідэнта ЗША Дональда Трампа імкнецца захаваць закрытасць інфармацыі ў федэральных ведамствах, асабліва інфармацыі, якая датычыцца прэзідэнта. Акрамя таго, Міністэрства юстыцыі наўрад ці будзе дамагацца крымінальнага пераследу чыноўнікаў, якія ігнаруюць патрабаванні Кангрэса, калі расследаванні закрануць дарадцаў Трампа і прызначэнцаў яго адміністрацыі.