Палаючы дрон ЗСУ дагнаў аўтамабіль з расіянамі

• 4.11.2026, 16:24

Эфектны ўдар трапіў на відэа.

У сетцы апублікавалі відэазапіс атакі ўкраінскага беспілотніка авіяцыйнага тыпу на аўтамабіль з расійскімі акупантамі. Момант удару зняў адзін з захопнікаў, які знаходзіўся ў кузаве машыны.

Як паведамляе «Цэнзар.НЕТ», на запісе бачны заключны этап атакі беспілотніка, які ўжо наблізіўся да мэты.

Расіяне спрабуюць уцячы ад беспілотніка, а адзін з іх крычыць: «Гані, гані!».

За імгненне да выбуху ў кадры з'яўляецца беспілотнік, на крылах якога бачны агонь. Верагодна, апарат атрымаў пашкоджанні, аднак працягнуў рух у напрамку аўтамабіля.

Беспілотнік падае як мінімум побач з машынай з акупантамі і выбухае. Судзячы па рэакцыі расіяніна, які вёў здымку з кузава, ён атрымаў раненне ў выніку ўдару.