На мяжы з Літвой пачынаецца маштабная рэканструкцыя пункта пропуску «Каменны Лог»

• 4.11.2026, 19:32

Што зменіцца для кіроўцаў.

На беларуска-літоўскай мяжы 5 лістапада пачнецца маштабная рэканструкцыя пункта пропуску «Каменны Лог» (з літоўскага боку — «Мядзінінкай»). Працы працягнуцца да 2029 года, але прапускная здольнасць памежнага пераходу не павінна змяніцца, паведамілі ў Мытным камітэце.

«5 лістапада 2026 года пачнуцца працы па маштабнай рэканструкцыі пункта пропуску «Каменны Лог». Планаваны тэрмін завяршэння мадэрнізацыі — 2029 год. У перыяд правядзення будаўнічых прац схема руху транспартных сродкаў будзе змяняцца без зніжэння бягучай прапускной здольнасці», — расказалі ў ведамстве.

Там папрасілі ўлічваць будучыя змены пры планаванні паездак праз беларуска-літоўскую мяжу.

Нагадаем, раней паведамлялася, што пасля рэканструкцыі прапускная здольнасць «Каменнага Лога» павінна павялічыцца ў тры разы — да 6000 аўтамабіляў у суткі. Для павелічэння прапускной здольнасці плануецца змяніць арганізацыю руху і павялічыць колькасць палос для аўтамабіляў.