У Лондане адкрылася найбуйнейшая ў Брытаніі крама, прысвечаная сусвету «Гары Потэра»

• 4.11.2026, 22:01

Адкрыццё крамы супала з падрыхтоўкай да выхаду новага серыяла па кнігах Джоан Роўлінг.

У цэнтры Лондана на Оксфард-стрыт адкрылася найбуйнейшая ў Вялікабрытаніі афіцыйная крама, прысвечаная сусвету «Гары Потэра». Яна пачала працу 4 лістапада, паведамляецца на сайце крамы.

У гандлёвай прасторы прадстаўленыя тавары па матывах кніг і фільмаў, эксклюзіўныя калекцыі і тэматычныя фотазоны. Сярод іх — адноўлены Крывы завулак, зона банка «Грынготс» з фігурай украінскага жалезнабрухага цмока і поўнапамерны аўтобус «Начны рыцар».

У краме таксама працуе кафэ «Дзіркавы кацёл», дзе наведвальнікам прапануюць маслянае піва ў халодным, гарачым і замарожаным выглядзе, а таксама марожанае з яго смакам.

Акрамя таго, для флагманскай крамы на Оксфард-стрыт выпусцілі асобную калекцыю тавараў, сярод якіх ёсць эксклюзіўная чарадзейная палачка «Крывы завулак».

Крама размешчаная ў комплексе The Ribbon па адрасе: Оксфард-стрыт, 134–140. Яна займае больш за 21 тыс. кв. футаў (каля 1951 кв. м) на двух паверхах.

Адкрыццё крамы супала з падрыхтоўкай да выхаду новага серыяла па кнігах Джоан Роўлінг. Яго прэм’ера на платформе HBO Max запланаваная на 25 снежня 2026 года.

Першы сезон пад назвай «Гары Потэр і філасофскі камень» будзе складацца з васьмі серый. Усяго стваральнікі плануюць выпусціць сем сезонаў — па адным на кожную кнігу цыкла.