Дэмакрат Джэфрыс вылучыў сваю кандыдатуру на пасаду спікера Палаты прадстаўнікоў ЗША

• 5.11.2026, 8:23

Палітык назваў сваёй галоўнай мэтай рашучыя дзеянні ў трох сферах.

Лідар дэмакратаў у Палаце прадстаўнікоў ЗША Хакім Джэфрыс афіцыйна абвясціў, што мае намер балатавацца на пасаду спікера Палаты прадстаўнікоў.

Пра гэта паведамляе Axios.

«Я пакорліва звяртаюся да вас з просьбай падтрымаць маю кандыдатуру на пасаду наступнага спікера Палаты прадстаўнікоў. Цяпер мы павінны ажыццявіць кардынальныя змены, якіх патрабуе большасць амерыканскага народа», — напісаў Джэфрыс у лісце калегам.

Ён дадаў, што «кожны член нашай большасці адыграе значную ролю», і што яго мэта — даць дэмакратам у Палаце прадстаўнікоў магчымасць «дзеіць рашуча ў трох ключавых напрамках». Сярод іх:

даступнасць;

падсправаздачнасць;

і амерыканскія каштоўнасці.

Axios піша, што хоць і некаторыя з нованаабраных дэмакратаў і прадстаўнікоў «чырвоных» акругаў адмовіліся пацвердзіць сваю падтрымку Джэфрыса на пасаду спікера, чакаецца, што ён не сутыкнецца з сур'ёзным супрацівам у барацьбе за гэтую пасаду.

Выданне тлумачыць, што большасць, атрыманая дэмакратамі на выбарах у Палату 3 лістапада, — яшчэ больш абароніць Джэфрыса ад любых патэнцыйных мяцежнікаў у ягонай фракцыі.

Таксама чакаецца, што каманда вышэйшага кіраўніцтва Джэфрыса будзе абраная без канкурэнцыі.

Нагадаем, што 56-гадовы заканадаўца з Брукліна Хакім Джэфрыс можа ўзначаліць Палату прадстаўнікоў 3 студзеня, калі адбудзецца галасаванне новага Кангрэсу. Ён можа стаць першым чарнаскурым спікерам у гісторыі краіны і ў выпадку прызначэння зменіць на пасадзе рэспубліканца Майка Джонсана.