Дэмакраты пасля перамогі маюць намер абвясціць Трампу імпічмент
- 5.11.2026, 8:59
Палітычны клінч толькі пачынаецца.
Дэмакраты хочуць прыцягнуць да адказнасці адміністрацыю Дональда Трампа, паведамляе TVN24.
«Калі хтосьці думае, што кампанія скончылася і ў амерыканскай палітыцы нарэшце надыдзе спакой, ён глыбока памыляецца. Палітычны клінч толькі пачынаецца: дзеючы прэзідэнт Дональд Трамп будзе настойліва рэалізоўваць распачатыя праекты, а новая дэмакратычная большасць у Кангрэсе паспрабуе яго спыніць», — адзначае тэлеканал.
І эксперты, і выбарцы-рэспубліканцы не сумняваюцца, што для Дональда Трампа гэта будзе няпросты час. «Адчуваю, што наступныя два гады будуць цяжкімі. Яны паспрабуюць пачаць працэдуру імпічменту Трампа, і, шчыра кажучы, я не магу іх за гэта вінаваціць. Мне здаецца, што мы прайгралі з-за яго», — ацаніў 27-гадовы выбарца-рэспубліканец Брэндан Морыс.
У першыя два гады свайго тэрміну Дональд Трамп меў амаль поўны кантроль над Кангрэсам, бо рэспубліканцы мелі большасць у абедзвюх палатах і рэдка пярэчылі рашэнням прэзідэнта. Аднак дэмакраты ўжо заяўляюць, што наступныя два гады яго прэзідэнцтва так выглядаць не будуць.
«Цяпер у нас будзе Кангрэс, які разумее, што ён працуе не на прэзідэнта, не на віцэ-прэзідэнта і не на Вярхоўны суд. Ён працуе на вас, на ўвесь амерыканскі народ», — заявіў лідар дэмакратаў у Палаце прадстаўнікоў Хакім Джэфрыс.
Узяўшы пад кантроль Палату прадстаўнікоў, дэмакраты атрымалі магчымасць блакаваць большасць заканадаўчых ініцыятыў Дональда Трампа. Адначасова яны змогуць больш эфектыўна прасоўваць уласныя законапраекты, пра што ўжо заяўляюць.
Найперш яны хочуць аднавіць субсідыі на медыцынскае страхаванне, адмяніць мытныя пошліны і аказаць ціск на прэзідэнта, каб ён скончыў вайну з Іранам.
Новы расклад сіл у Кангрэсе і аслабленая пазіцыя Дональда Трампа могуць падштурхнуць частку рэспубліканцаў да супрацоўніцтва з дэмакратамі.
«Больш разважлівыя рэспубліканцы, у пэўным сэнсе прыглушаныя прыхільнікамі Трампа, які захапіў Рэспубліканскую партыю, змогуць, магчыма, больш свабодна выказваць свае погляды», — сказала загадчыца кафедры амерыканістыкі і масмедыя Лодзінскага ўніверсітэта прафесар Паўліна Матэра.
Дэмакратычная партыя таксама возьме пад кантроль камітэты ў Палаце прадстаўнікоў і ў Сенаце, а Роберт Гарсія — кангрэсмен з Каліфорніі, які павінен узначаліць камітэт, адказны за правядзенне расследаванняў, — у аўторак папярэдзіў рэспубліканцаў, каб яны «нанялі адвакатаў».
«Дэмакраты цяпер атрымаюць паўнамоцтвы праводзіць слуханні, выклікаць сведкаў для дачы паказанняў і патрабаваць прадстаўлення дакументаў у межах працы сваіх камітэтаў», — паведаміў рэпарцёр CNN Ману Раджу.
«Яны плануюць распачаць расследаванні ў дачыненні да прэзідэнта Трампа», — дадаў ён.
Пад прыцэлам камітэтаў могуць апынуцца бізнес-інтарэсы сям'і Дональда Трампа, яго рашэнне пачаць вайну з Іранам або справа Джэфры Эпстайна, але, паводле паведамленняў СМІ, адной з першых мэтаў расследаванняў дэмакратаў могуць стаць Ілан Маск або міністр абароны Піт Хэгсет. Рэспубліканцы папярэджваюць, што будуць блакаваць дзеянні дэмакратаў.
«Калі бліжэйшыя два гады пройдуць пад знакам помсты і выкарыстання працэдур для палітычнай барацьбы, ад гэтага пацярпаюць амерыканцы. Але мы зробім усё, каб гэтага не дапусціць. Рэспубліканцы ў Палаце стануць заслонай, якая спыніць такія дзеянні», — запэўніў спікер Палаты прадстаўнікоў Майк Джонсан.
Большасць для імпічменту
Кантроль над Сенацам, у сваю чаргу, дасць дэмакратам магчымасць блакаваць прызначэнні Дональда Трампа, у прыватнасці на судзейскія пасады і ў склад яго кабінета. Большасць у абедзвюх палатах дазваляе ім таксама пачаць працэдуру імпічменту, гэта значыць выставіць абвінавачанні прэзідэнту і членам яго адміністрацыі.
Аднак для адхілення іх ад пасады патрэбная падтрымка дзвюх трацін сенатараў, прысутных у зале, што пры цяперашнім раскладзе сіл было б надзвычай складана, але дэмакраты такіх крокаў не выключаюць.
«Мы не можам дапусціць, каб яшчэ два гады прайшлі без прыцягнення гэтай адміністрацыі да адказнасці. Некаторыя хочуць засяродзіцца перадусім на прэзідэнце Трампе, але ж ёсць і іншыя члены яго адміністрацыі, якія павінны адказаць за свае дзеянні», — заявіў сенатар-дэмакрат ад Каліфорніі Алекс Падылья.
Трамп хоча супрацоўнічаць з дэмакратамі
Нават атрыманне кантролю над абедзвюма палатамі Кангрэса не дае дэмакратам поўнага кантролю над дзяржавай, бо амерыканскі прэзідэнт па-ранейшаму мае права вета на законы, прынятыя Кангрэсам, якое можна пераадолець толькі большасцю ў дзве траціны галасоў у абедзвюх палатах адначасова.
Дональд Трамп намякаў, што будзе ахвотна карыстацца правам вета, але пасля выбараў у размове з «New York Times» заявіў, што яго адміністрацыя будзе супрацоўнічаць з дэмакратамі.
«Замест канфрантацыйнай рыторыкі, якую мы чулі раней з Белага дома, Трамп цяпер намякае, што, магчыма, удасца дасягнуць нейкай дамоўленасці і разам нешта выпрацаваць», — пацвердзіла рэпарцёр CNN Кэці Холмс.
У размове з Politico амерыканскі прэзідэнт таксама прызнаў, што не хоча два гады «проста сядзець і ўсё накладваць вета», а дэмакраты нібыта ўжо тэлефанавалі яму наконт будучага супрацоўніцтва.