«Дызельная здзелка» на мяжы зрыву

• 5.11.2026, 10:59

Танкеры рэзка змянілі курс.

Два з трох нафтавых танкераў з расійскім палівам, якія накіроўваліся ў ЗША, змянілі курс, паставіўшы пад пагрозу раней заключаную дызельную здзелку паміж прэзідэнтам ЗША Дональдам Трампам і расійскім дыктатарам Уладзімірам Пуціным.

Пра гэта паведамляе Financial Times.

Паводле дадзеных FT, расійскі танкер «Talisman» і «Leruo», які належыць гонконгскай кампаніі і ходзіць пад сцягам Сьера-Леонэ, больш не пазначаюць атлантычнае ўзбярэжжа ЗША як пункт прызначэння.

З 2 лістапада «Leruo» змяніў курс на Бразілію, а «Talisman» выйшаў у Міжземнае мора і цяпер знаходзіцца каля берагоў Алжыра, перадаючы сігнал «for orders» (з англ. — «чакае распараджэнняў»).

Гэта азначае, што груз пакуль не мае пацверджанага пакупніка або порта прызначэння. Абодва танкеры знаходзяцца пад санкцыямі Еўрапейскага саюза.

Трэці танкер «Agioi Fanendes», які належыць грэчаскай суднаходнай кампаніі Eastern Mediterranean Maritime, працягвае рух у бок ЗША, аднак перадае сігнал «for orders».

«Танкер павінен прыбыць у Нью-Ёрк у гэтыя выхадныя. Аднак, улічваючы відавочную асцярожнасць амерыканскіх пакупнікоў з-за рэгуляторных, заканадаўчых і санкцыйных рызык, не будзе дзіўна, калі і гэты танкер зменіць курс, адмовіўшыся ад заходу ў ЗША», — адзначыў аналітык кампаніі Kpler Мэт Сміт.

Тым часам танкер «Beast», які знаходзіцца пад санкцыямі і належыць кампаніям з Сейшэльскіх астравоў, загрузіўся ў расійскім порце Прыморск 27 кастрычніка і працягвае трымаць курс на атлантычнае ўзбярэжжа ЗША.