Рэспубліканская партыя ЗША шукае новага лідара

• 5.11.2026, 13:27

Галасы крытыкаў Трампа становяцца ўсё больш прыкметнымі.

Параза Рэспубліканскай партыі на прамежкавых выбарах у ЗША справакавала ўзаемныя абвінавачанні, большая частка якіх адрасавана Дональду Трампу, піша Bloomberg. Паводле звестак выдання, вынікі галасавання выявілі глыбокія рознагалоссі ўнутры партыі і абвастрылі барацьбу за ролю палітычнага пераемніка Трампа на выбарах 2028 года.

Магчымыя пераемнікі прэзідэнта пачалі дыстанцыявацца ад яго палітыкі і крытыкаваць рашэнні адміністрацыі. Пасля дзесяці гадоў дамінавання Трампа новае пакаленне рэспубліканцаў спрабуе скарэктаваць курс партыі.

Віцэ-прэзідэнт Джэй Дзі Вэнс, якога лічаць галоўным прэтэндэнтам на вылучэнне, патлумачыў паразу вайною з Іранам, ростам кошту жыцця і стасункамі ЗША з Ізраілем. Паводле яго ацэнкі, з-за вайны рэспубліканцы страцілі кантроль над Сенатам як мінімум на шэсць гадоў. Аднак, адзначае Bloomberg, Вэнсу будзе няпроста дыстанцыявацца ад Трампа, бо ён сам уваходзіць у яго адміністрацыю.

Губернатар Фларыды Рон Дэсанціс, які раней стрымана выказваўся пра свае планы на 2028 год, пачаў пазіцыянаваць сябе як «законнага пераемніка» партыі. Вынікі выбараў ён назваў «падзеяй, блізкай да вымірання» для рэспубліканцаў і запатрабаваў забараніць тарговлю акцыямі для членаў Кангрэса і чыноўнікаў выканаўчай улады. Bloomberg бачыць у гэтым ускосны выпад на адрас Трампа: згодна з фінансавай справаздачнасцю, за першы год прэзідэнцтва ён здзейсніў дзясяткі тысяч аперацый з каштоўнымі паперамі.

Сенатар Тэд Круз назваў вынікі выбараў гістарычнай паразай і звязаў яе з незадаволенасцю амерыканцаў мытнымі пошлінамі, вайной на Блізкім Усходзе і бескантрольным будаўніцтвам цэнтраў апрацоўкі дадзеных.

Былы кандыдат у прэзідэнты Міт Ромні таксама раскрытыкаваў тарыфную палітыку Трампа, «імпульсіўную» вайну і «відавочную карупцыю».