Колькі чакаюць часовы побыт, сталы побыт і карту рэзідэнта ў розных ваяводствах Польшчы?

• 5.11.2026, 17:48

Беларусам да ведама.

Найхутчэй від на жыхарства (ВНЖ) у Польшчы выдаюць у Малапольскім ваяводстве (Кракаў). Гэта вынікае з інфармацыі польскага ўпраўлення па справах замежцаў, якую прыводзіць рэсурс спецыялістаў па міграцыі Krakspire; статыстыка сабраная за перыяд з 1 студзеня па 28 верасня 2026 года, піша Most.

Часовы побыт

Менш за год працэс займае ў шасці ваяводствах. Гэта Малапольскае (249 дзён), Вармінска-Мазурскае (278 дзён), Падкарпацкае (313 дзён), Свентакшыскае (328 дзён), Ніжнесілезскае (329 дзён) і Вялікапольскае (343 дні) ваяводствы.

Рэсурс Expat Essentials сабраў інфармацыю за поўныя дзевяць месяцаў 2026 года з ваяводскіх дзяржаўных органаў (ужондаў), аднак яе надалі толькі 10 з 16 ваяводстваў. Тэрміны падобныя да статыстыкі ўпраўлення па справах замежцаў. Так, у Малапольскім ваяводстве гэта 250 дзён, у Вармінска-Мазурскім — 279 дзён.

Яшчэ ў васьмі ваяводствах, паводле даных упраўлення па справах замежцаў, разгляд спраў аб часовым побыце доўжыцца да 18 месяцаў. Столькі рашэнняў у сярэднім чакаюць у Лодзкім (383 дні), Люблінскім (389 дзён), Мазавецкім (425 дзён), Падляскім (470 дзён), Заходнепаморскім (461 дзень), Апольскім (498 дзён), Любушскім (519 дзён) і Куяўска-Паморскім (547 дзён).

Найцяжэйшая сітуацыя складваецца ў Паморскім (622 дні) і Сілезскім (680 дзён) ваяводствах.

Сталы побыт

Разгляд спраў аб сталым побыце ў сярэднім займае менш часу.

У двух ваяводствах на гэта сыходзіць у сярэднім да паўгода: у Малапольскім — 169 дзён і Любушскім — 174 дні.

Ад шасці месяцаў да года чакаюць у Куяўска-Паморскім (194 дні), Вялікапольскім (233 дні), Свентакшыскім (245 дзён), Мазавецкім (250 дзён), Вармінска-Мазурскім (268 дзён), Лодзкім (328 дзён) і Падкарпацкім (353 дні) ваяводствах.

Звыш года сярэднія паказчыкі ў Паморскім (377 дзён), Ніжнесілезскім (405 дзён), Люблінскім (408 дзён), Заходнепаморскім (415 дзён), Сілезскім (447 дзён) і Падляскім (505 дзён) ваяводствах. А ў Апольскім сярэдні тэрмін чакання (607 дзён) перавышае паўтара года.

Карта доўгатэрміновага рэзідэнта ЕС

Адзінае ваяводства, дзе рашэнні па карце рэзідэнта выдаюць менш чым за паўгода, — Малапольскае (122 дні).

Да года працэс займае ў Вармінска-Мазурскім (240 дзён), Свентакшыскім (272 дні), Лодзкім (278 дзён), Вялікапольскім (341 дзень), Куяўска-Паморскім (359 дзён) і Люблінскім (361 дзень) ваяводствах.

Ад года да паўтара года працэс расцягваецца ў Падкарпацкім (375 дзён), Любушскім (423 дні), Мазавецкім (445 дзён), Заходнепаморскім (469 дзён), Ніжнесілезскім (500 дзён) і Падляскім (517 дзён).

У Сілезскім ваяводстве чакаюць звыш паўтара года (668 дзён), а ў Апольскім (787 дзён) і Паморскім (799 дзён) ваяводствах — звыш двух гадоў.