«Здаецца, менавіта так пахне свабода»

• 5.11.2026, 18:34

Кадры з унікальнага для Беларусі месца.

Жыхарку Наваполацка ўразілі віды неба над самым вялікім балотам Беларусі. Яна падзялілася ў сацсетцы Threads здымкамі, зробленымі на звычайны смартфон.

«Гэтыя фатаграфіі Ельні надта прыгожыя, каб пакінуць іх пыліцца ў тэлефоне, — піша навапалачанка. — Яркае зарэва неба над дзікай, самабытнай прасторай балот. Здаецца, менавіта так пахне свабода».

«Першародныя ландшафты і бяскрайнія касмічныя прасторы, — дадаў адзін з каментатараў. — Багатая палітра фарбаў, што змяняецца разам з парамі года. Ельня — найпрыгажэйшае балота ў Беларусі, якое абавязкова варта ўбачыць!»

Балота Ельня размешчана ў межах Полацкай нізіны. Яго плошча складае прыблізна 20 тысяч гектараў. Па гэтым паказчыку камплекс уваходзіць у пяцёрку буйнейшых вярховых балот Еўропы.