Стары Mercedes з характарам суперкара: культавы AMG Hammer вяртаецца

• 6.11.2026, 10:50

Нямецкая фірма намякнула на сучасную інтэрпрэтацыю легендарнага аўтамабіля.

Кампанія HWA, вядомая распрацоўкай і зборкай гоначных аўтамабіляў Mercedes-AMG, а таксама легендарнага CLK GTR Straßenversion, рыхтуе маштабны новы праект у сферы рэстамоду. Нямецкая фірма намякнула на сучасную інтэрпрэтацыю культавага AMG Hammer — аўтамабіля, які яшчэ ў 1980-х гадах назаўсёды змяніў уяўленне пра звышмагутныя седаны.

Арыгінальны Hammer з’явіўся ў сярэдзіне 80-х як самая дасканалая версія седана пакалення W124. Гэта быў час, калі AMG яшчэ была незалежнай кампаніяй, а не падраздзяленнем Mercedes-Benz. Заводскі 3,0-літровы атмасферны шасціцыліндравы рухавік замянілі на 5,5-літровы V8 магутнасцю 355 к.с. (крутоўны момант — 526 Нм), што дазволіла заднепрывадному седану разганяцца ад 0 да 100 км/гадз усяго за 5 секунд. Пазней з’явілася яшчэ больш магутная 6,0-літровая версія (385 к.с.), якая замацавала за мадэллю статус сапраўднай іконы з Афальтэрбаха, піша CarScoops.

Агрэсіўны знешні выгляд і сучасныя тэхналогіі

На дадзены момант HWA апублікавала ў сацыяльных сетках толькі адзін тызер. Хоць інжынеры наўпрост не называюць навінку пераемнікам Hammer, пазнавальны сілуэт W124 гаворыць сам за сябе.

Аўтамабіль атрымаў сучасную святлодыёдную оптыку, а калі правесці паралель з папярэднім праектам кампаніі — адроджаным 190E Evo II, — то можна чакаць пашыраных колавых арак і глыбокай мадэрнізацыі хадовай часткі. У HWA адзначаюць, што аўтамабіль застанецца «верным сваім караням, адначасова разсуваючы межы сучасных тэхналогій: знаёмая канцэпцыя набывае зусім новую форму».

Які менавіта рухавік апынецца пад капотам — пакуль застаецца загадкай. Цалкам магчыма, што гэты рэстамод атрымае 3,0-літровы V6 з двайным турбонаддувам ад мадэлі Evo II, які развівае магутнасць 444 к.с. і крутоўны момант 550 Нм.