Кыргызстан накіраваў ультыматыўную ноту РФ

• 6.11.2026, 12:58

Услед за Казахстанам краіна патрабуе ад Масквы вяртання дадому сваіх грамадзян, завербаваных на вайну.

Пасольства Кыргызстана ў Расіі накіравала ноту ў МЗС РФ з заклікам вярнуць на радзіму грамадзяніна рэспублікі, якога «ў выніку махлярскіх дзеянняў з боку неўстаноўленых асоб» завербавалі ў расійскае войска на вайну ва Украіну. Раней у падобных сітуацыях вяртання сваіх грамадзян дадому ад Масквы ўжо дамагаліся казахстанскія дыпламаты.

У ноце гаворка ідзе пра 21-гадовага Элістана Токтогулова з Таласкай вобласці Кыргызстана, удакладняе «Азаттык Азія». Юнак увосень 2026 года наткнуўся ў сацсетках на аб’яву ад быццам бы суайчынніка, які жыве ў Расіі. Вербавальнік паабяцаў Токтогулову некалькі грамадзянскіх вакансій у РФ, напрыклад ахоўніка і кіроўцы, з заробкам у 110 тысяч рублёў, што ўтрая вышэй за медыянны заробак у Кыргызстане. Элістан паехаў у чужую краіну, дзе яго падманам прымусілі падпісаць кантракт з Мінабароны і адправілі на палігон у Варонежскай вобласці для падрыхтоўкі да баявых дзеянняў ва Украіне. Блізкія Токтогулова, з якімі юнак змог звязацца, 3 лістапада выйшлі на пікет у горадзе Манасе і запісалі відэазварот да ўладаў з просьбай вярнуць сваяка з замежнай арміі. Афіцыйны Бішкек неўзабаве ўмяшаўся ў сітуацыю, заклікаўшы расійскі бок не толькі адпусціць рэкрута, але і праверыць вербаванне Токтогулова для «устанаўлення вінаватых асоб і забеспячэння іх прыцягнення да адказнасці ў адпаведнасці з заканадаўствам».

Пры гэтым улады Кыргызстана прызналі, што іх грамадзянам, якія знаходзяцца ў РФ, пагражае рызыка вербоўкі ў ваюючую армію. «Міністэрства [замежных спраў] рэкамендуе грамадзянам [Кыргызстана] з мэтай пазбягання магчымых негатыўных наступстваў уважліва вывучаць змест кантрактаў і іншых дамоваў перад іх падпісаннем, звяртаючы асаблівую ўвагу на ўзятыя на сябе абавязкі і прававыя наступствы», — гаворыцца ў ноце.

Раней пры падобных абставінах вяртання суайчыннікаў ад Крамля дамагліся ўлады Казахстана. Дванаццаць грамадзян дзяржавы 22 кастрычніка вярнуліся дадому, будучы вызваленымі ад абавязацельстваў перад Мінабароны РФ, пісаў мясцовы «Курсіў». Як сцвярджалі выхадцы з розных казахстанскіх абласцей, усе яны паехалі ў Расію, паверыўшы ў абяцанні высокааплатнай выключна грамадзянскай працы. Але на месцы наймальнікі прымусілі іншаземцаў падпісаць армейскія кантракты і адправілі на фронт ва Украіну.

Незалежная камісія Генасамблеі ААН па расследаванні злачынстваў падчас вайны ва Украіне ў канцы кастрычніка ў спецыяльным дакладзе заяўляла, што факты вербоўкі ў расійскую армію шляхам падману або прымусу ўжо даказаныя адносна выхадцаў як мінімум з 29 краін. Гэта не толькі рэспублікі былога СССР, але і краіны Афрыкі, Лацінскай Амерыкі, Блізкага Усходу і Паўднёвай Азіі.

Аўтары дакладу падкрэслівалі, што вербавальнікі ў розных дзяржавах аднолькава дзейнічаюць сярод найбольш уразлівых і малазабяспечаных груп насельніцтва. Яны абяцаюць рэкрутам грамадзянскую працу ў Расіі, а ў некаторых выпадках асобна «гарантуюць», што тыя не трапяць на вайну. Аднак пасля прыбыцця ў РФ фактычных навабранцаў сілай або падманам змушаюць падпісваць кантракты з Мінабароны на рускай мове, часта незразумелай ахвярам махлярскай вербоўкі.