«Куды так спяшаецца Лукашэнка?»

• 6.11.2026, 16:54

Што не так з адкрыццём новай бальніцы ў Мінску.

Аналітык Сяргей Чалы распавёў пра нядаўняе адкрыццё новай інфекцыйнай бальніцы ў Мінску. Яго словы прыводзіць «Салідарнасць».

— Перцоў і Эйсмант нядаўна абмяркоўвалі кавід. Маўляў, той, хто павінен быў захварэць і заразіцца, — захварэў і заразіўся. Як вам падыход «самага эфектыўнага ў свеце змагара з кавідам»: каму суджана, той памрэ? — задае пытанне Сяргей Чалы ў праграме на «Белсаце». — Вось такі дарвінізм. Затое эканоміку не спынілі. Як брыдка гэта гучыць.

Нядаўна ў Мінску адкрылі інфекцыйную бальніцу. На адкрыццё прыязджаў і Лукашэнка. У сваёй прамове ён распавёў, як уладкаваная бальніца: незалежныя блокі, кожны з якіх у любы момант можна цалкам ізаляваць, а ў выпадку новай эпідэміі магутнасць стацыянара можна павялічыць у два разы. Такі падыход кіраўнік называе вынясеннем урокаў з нядаўняй пандэміі.

— Паглядзім на план бальніцы. Там прадугледжаны санітарны бар'ер, ізаляваныя модулі (чатыры палатныя карпусы), якія размешчаны такім чынам, што ўваход у іх для пацыентаў арганізаваны толькі з боку вуліцы, а медыцынскі персанал трапляе ўнутр праз калідоры. Прадугледжана энергетычная незалежнасць: уласнае цеплазабеспячэнне, кацельня — то бок бальніца нават не залежыць ад гарадскіх цепласетак. Таксама там ёсць уласны гаспадарчы блок, у якім прадугледжана знішчэнне біяматэрыялаў. То бок ні інвентар, ні халаты, ні іншыя матэрыялы за межы перыметра не выходзяць.

Таксама бачна, што ў палатах можна лёгка размясціць яшчэ пару ложкаў. Гэта азначае, што бальніца першапачаткова спраектаваная з магчымасцю ушчыльнення. Прадумана і транспартная лагістыка — адтуль ёсць прамы выезд на МКАД.

І самае галоўнае — кальцавы контур. Вакол усёй тэрыторыі праходзіць суцэльная кальцавая асфальтаваная дарога для патрулявання, а на ўездзе ўсталяваны КПП. Пасты ўзброенай аховы дазваляюць імгненна перакрыць уезд на тэрыторыю і выезд з яе.

Перцоў кажа, што гэты аб'ект збудавалі за 20 месяцаў. Гэта рэкордныя тэрміны. Звычайна такія аб'екты будуюцца каля пяці гадоў. Потым ён зноў згадвае пандэмію і распавядае, што Беларусь вывучыла расійскі досвед — «модульныя бальніцы, якія будавала Міністэрства абароны». І адзначае, што цяпер у Беларусі таксама ёсць такая тэхналогія.

А цяпер хочацца задаць пытанне: куды вы гэтак спяшаецеся? Што адбылося? Да якой пандэміі вы рыхтуецеся? Папярэдняя даўно скончылася. Лукашэнка — «чэмпіён свету» паводле таго, як ён яе прайшоў. Дык што здарылася?

Раскажу гісторыю, якую мне распавёў чалавек, прысутны на нарадзе ў Лукашэнкі ў самым пачатку пандэміі. Калі толькі з'явіліся першыя пацыенты з кавідам, ён сабраў медыкаў. Па правую руку ад сябе пасадзіў грамадзянскіх лекараў, па левую — ваенных.

Па словах гэтага чалавека, грамадзянскія медыкі казалі, што гэта незразумелая, невядомая інфекцыя, а не гэтае «хто выжыве, а хто не выжыве». Яны тлумачылі, што неабходныя каранцін, масачны рэжым і сацыяльнае дыстанцыяванне. Але Лукашэнка не хацеў усяго гэтага.

Ён думаў, што пасадзіць побач ваенных медыкаў і выкліча спрэчку. Але тыя сказалі, што гатовыя да такой сітуацыі. У іх яшчэ з часоў халоднай вайны захаваліся пратаколы дзеянняў на выпадак біялагічнай вайны. Яны прапанавалі пабудаваць асобную часовую бальніцу з ізаляванымі боксамі, кожны з якіх меў бы два ўваходы. А калі ўсё скончыцца — знішчыць аб'ект разам з усім, што там знаходзілася.

Лукашэнка на гэта не пайшоў. Паводле некаторых ацэнак, за некалькі хваль пандэміі ў Беларусі памерла каля 90 тысяч чалавек. А цяпер паглядзіце, што ён робіць. Тое, што павінен быў зрабіць яшчэ тады. Але для чаго? І чаму менавіта цяпер?

Я яшчэ адзначу, што пасля 2022 года, калі нашы шпіталі былі запоўненыя расійскімі ваеннымі, гэты досвед радыкальна змяніў падыход аб'яднанай групоўкі войскаў да тылавога забеспячэння.

Нядаўна праводзіліся вучэнні «Эшалон», на якіх адпрацоўвалі эвакуацыю параненых і арганізацыю шпітальнай базы на фронце і ў тыле. Цяжкапараненых падчас гэтых вучэнняў эвакуявалі санітарнай авіяцыяй і эвакуацыйнымі цягнікамі, накіроўваючы ў спецыяльныя ваенныя шпіталі.

Груба кажучы, гэта бальніца можа імгненна ператварыцца ў шпіталь такога кшталту. То бок гэта не толькі для пандэміі.