Расіяне рэзка павялічылі вывад капіталу за мяжу
- 6.11.2026, 20:41
За месяц грамадзяне РФ вывелі амаль $1 мільярд на брокерскія рахункі.
Падчас правядзення выбараў расіяне рэзка павялічылі вывад капіталу за мяжу. У верасні, паводле папярэдняй ацэнкі Цэнтрабанка РФ, яны пералічылі на рахункі брокерам-нерэзідэнтам рэкордныя за ўсю гісторыю назіранняў 80 млрд руб., або каля $940 млн, зыходзячы з сярэдняга за месяц курсу долара. Папярэдні рэкорд быў усталяваны ў маі 2025 г. — 52,3 млрд руб., перадае The Moscow Times.
Людзі сталі больш актыўна выкарыстоўваць брокераў для пераказаў пасля таго, як заходнія банкі ужорстчылі падыход да расійскіх грошай. З пачатку 2025 г. расіяне пералічылі замежным брокерам 695 млрд руб.
Прыкладна 30% гэтых грошай — гэта так званыя «паркавальныя рашэнні», калі брокерскі рахунак выкарыстоўваецца як альтэрнатыва валютнаму банкаўскаму рахунку, ацэньваў заснавальнік інвестыцыйнай платформы Lender Invest Дзмітрый Ісакоў. Яшчэ каля 10% — гэта «рэлакацыя капіталу» на выпадак пераезду — пры гэтым брокерскі рахунак выступае першым звяном у далейшай ланцужцы пераказаў.
Брокерам з краін ЕАЭС, напрыклад Казахстана або Арменіі, можна пералічыць рублі, затым канвертаваць у валюту і сфарміраваць партфель. Яго можна будзе перавесці на рахунак у заходнім брокеры, адкрыць які значна прасцей, чым банкаўскі. «Паводле майго досведу, дэпазітарны перанос папер еўрапейскаму брокеру ад партнёрскага брокера, рахунак у якога можна папоўніць рублямі з РФ, праходзіць камплаенс-праверку лягчэй, чым залічэнне грошай з паходжаннем з РФ у банк ЕС», — пісала незалежная фінансавая саветніца Наталля Смірнова.
Людзі выкарыстоўваюць брокерскія рахункі не толькі для вываду грошай, але і для інвестыцый. Расійскі фондавы рынак падчас вайны ў асноўным прыносіць страты. Паводле разлікаў Цэнтрабанка, індэкс Мосбіржы нават з улікам дывідэндаў прынёс страту з пачатку гэтага года, за апошнія 12 месяцаў і з пачатку 2022 г. Замежныя паперы таксама дазваляюць дыверсіфікаваць партфель. Да вайны расійскія інвестары маглі купляць замежныя каштоўныя паперы на Маскоўскай і СПБ біржах, але з-за санкцый іх заблакавалі на рахунках больш як 1,5 млн чалавек. Але цікавасць расіян да замежных актываў нікуды не знікла, ЦБ яшчэ ў 2023 г. папярэджваў аб пагрозе ператоку інвестараў на замежныя рынкі.
Усё ж, нягледзячы на санкцыі, людзі выводзяць грошы і традыцыйным спосабам — банкаўскімі пераказамі. У верасні, паводле ацэнкі ЦБ, яны пералічылі на свае рахункі ў замежных банках на 26,6 млрд руб. больш, чым вярнулі з-за мяжы. Амаль увесь мінулы год і ў пачатку гэтага расіяне вярталі грошы ў краіну, але ў красавіку плынь развернулася: за паўгода адток склаў 133 млрд руб.