ЗША адрэзалі ад фінсістэмы адну з найбуйнейшых крыптабіржаў свету

• 7.11.2026, 3:04

Яна працавала і ў Беларусі.

Міністэрства фінансаў ЗША фактычна пазбавіла крыптабіржу MEXC Global доступу да амерыканскай фінансавай сістэмы з-за аперацый, звязаных з абыходам санкцый. Пра гэта паведаміла Упраўленне па барацьбе з фінансавымі злачынствамі (FinCEN) Мінфіна ЗША.

Паводле звестак ведамства, з мая 2021 года па май 2026-га праз платформу прайшло не менш як $16 млрд, звязаных з абыходам санкцый, кіберзлачыннасцю і іншай незаконнай дзейнасцю.

«Гэта ўключае амаль $1,5 млрд у транзакцыях, звязаных з абыходам расійскіх санкцый, у тым ліку $232 млн у прамых транзакцыях з арганізацыямі, якія знаходзяцца пад санкцыямі ЗША, ЕС і Вялікабрытаніі», — заявілі ў ведамстве.

У канцы кастрычніка MEXC заявіла пра спыненне аказання паслуг карыстальнікам у Расіі і Беларусі. Рашэнне было прынята «ў рамках пастаяннай працы па ўдасканаленні сістэмы выканання рэгуляторных патрабаванняў».

MEXC — адна з найбуйнейшых у свеце крыптабіржаў.