Каля Белага дома затрымалі мігранта з Венесуэлы са зброяй

• 7.11.2026, 8:36

Ён заявіў, што чує галасы, якія загадваюць яму прыехаць у Вашынгтон.

Сакрэтная служба ЗША затрымала паблізу Белага дома мужчыну з трыма адзінкамі агнястрэльнай зброі. Ён заявіў, што чує галасы, якія загадваюць яму прыехаць у Вашынгтон і забіць Трампа.

Пра гэта паведамляе Associated Press.

Затрыманне адбылося ўвечары ў чацвер, 5 лістапада. Супрацоўнікі Сакрэтнай службы падышлі да мужчыны, які паводзіў сябе падазрона ў прыпаркаваным аўтамабілі.

Паводле звестак амерыканскіх чыноўнікаў, затрыманы распавёў, што чуе ў галаве галасы. Яны нібыта загадвалі яму прыехаць у сталіцу і забіць прэзідэнта.

Хутка высветлілася, што аўтамабіль лічыцца выкрадзеным. У ім знайшлі тры адзінкі агнястрэльнай зброі і дзясяткі патронаў.

Падазраванага завуць Ронни Йордрикс Гуанипа Чинос. Паводле даных Міністэрства ўнутранай бяспекі, гэта мігрант з Венесуэлы, які знаходзіцца ў ЗША незаконна. У краіну ён трапіў праз Тэхас у сакавіку 2024 года.

Яму ўжо выстаўлены абвінавачанні, цяпер ён знаходзіцца пад вартай Службы маршалаў ЗША.

У Белым доме сітуацыю не пракаментавалі, перанакіраваўшы пытанні ў Міністэрства ўнутранай бяспекі і Сакрэтную службу.

Пагрозы жыццю Трампа гучаць не ўпершыню. У ноч на 26 красавіка паводле кіеўскага часу, падчас вячэры прэзідэнта ЗША з журналістамі пула Белага дома ў гатэлі Washington Hilton, узброены мужчына прарваўся праз прапускны пункт і адкрыў агонь. Трампа тэрмінова эвакавалі, а аднаго з афіцэраў аховы паранілі, аднак ад гібелі яго выратаваў бранежылет.

Страляком аказаўся 31-гадовы настаўнік Коул Аллен з каліфарнійскага Торранса, затрыманы на месцы. Пазней, паводле СМІ, ён прызнаўся, што планаваў страляць па службовых асобах адміністрацыі Трампа.