У Беларусі будуць хутчэй прыбіраць з двараў кінутыя аўтамабілі

• 7.11.2026, 19:55

Новыя правілы будуць дзейнічаць з 13 лістапада.

Не атрымалі ліст пра кінуты аўтамабіль? Праз 10 дзён вы ўсё адно лічыцеся паведамленымі. Новыя правілы пачнуць дзейнічаць у Беларусі з 13 лістапада.

Аўтамабілістаў чакаюць тры папраўкі.

Першая датычыцца колькасці інфармацыі, якая цяпер будзе даступная камунальным службам.

Калі раней камунальныя службы атрымлівалі ад дзяржорганаў толькі звесткі пра ўладальніка, то цяпер ім перададуць і звесткі аб рэгістрацыі транспартнага сродку, парушэннях ПДР і асобах, якія афармлялі страхоўку.

Мяняецца і парадак апавяшчэння па пошце.

«Уладальнік, які не забраў заказны ліст, лічыцца паведамленым на 10-ы каляндарны дзень пасля адпраўкі. Камунальныя службы ў такім выпадку ўсё адно эвакуіруюць аўтамабіль», — патлумачыў інжынер УЖРЭП Кастрычніцкага раёна Гродна Аляксандр Сарока.

Трэцяя папраўка датычыцца суда: тэрмін падачы заявы аб прызнанні аўтамабіля бесгаспадарчым скарачаецца з 30 да 10 дзён.

«Эвакуацыя патрэбная, таму што кінутыя аўтамабілі перашкаджаюць уборцы вуліц, чыстцы снегу і камунальным работам. Акрамя таго, з іржавых кузаваў, разбітых акумулятараў і бакаў выцякаюць тэхнічныя вадкасці, якія забруджваюць глебу і ваду», — тлумачаць спецыялісты.

З пачатку года ў Гродне ўжо вывезлі 50 транспартных сродкаў, прызнаных кінутымі.