Відэафакт: па Гомелі ехаў аўтамабіль са спячым кіроўцам

• 9.11.2026, 11:17

Небяспечны аўтамабіль спынілі іншыя аўтамабілісты.

У Гомелі кіроўца Mitsubishi заснуў за рулём падчас руху. Аўтамабіль павольна каціўся па Рэчыцкім праспекце, пакуль яго не спынілі відавочцы. Відэа апублікавала ДАІ.

Аўтамабілісты заўважылі легкавік, паведамілі пра яго інспектарам і дапамаглі спыніць машыну.

Калі супрацоўнікі ДАІ прыбылі на месца, кіроўца заявіў, што хоча дадому. Інспектар патлумачыў яму, што ён кіраваў аўтамабілем у нецвярозым стане.

— Хачу — і п’яны езджу. Хачу — неп’яны езджу. У мяне трое дзяцей, я шматдзетны бацька, — сказаў мужчына.

Ад медыцынскага агляду кіроўца адмовіўся. На яго склалі пратакол паводле ч. 2 арт. 18.15 КаАП, прызначылі штраф у памеры 200 базавых велічынь — 9000 рублёў — і пазбавілі правоў на пяць гадоў.