Работнікам з Рэчыцы з красавіка не выплачваюць заробак
- 9.11.2026, 15:29
Рабочыя запісалі калектыўны відэазварот.
Група рэчыцкіх рабочых запісала відэа, у якім распавядае, што мясцовае рамонтна-будаўнічае ўпраўленне №132 дагэтуль не аплаціла ім працу, выкананую па дагаворах падраду яшчэ ў красавіку 2026 года. Зварот апублікаваў Telegram-канал «Беларусь за МКАДом».
Мужчыны распавядаюць, што ў перыяд з 19 студзеня па 20 красавіка 2026 года яны супрацоўнічалі па дагаворах падраду з ТАА «РБУ №132» горада Рэчыца. Паводле дагавораў, яны выконвалі работы ў рачным порце ў вёсцы Азёршчына Рэчыцкага раёна.
«Свае абавязкі па дагаворах мы выканалі ў поўным аб’ёме і ў найкарацейшыя тэрміны, што пацвярджаецца падпісанымі актамі здачы-прыёмкі выкананых прац», — сцвярджаюць аўтары відэа.
Наймальнік павінен быў аплаціць працу на працягу пяці дзён з моманту падпісання актаў здачы-прыёмкі, аднак гэтага так і не адбылося дагэтуль — а ўжо лістапад.
Паводле слоў работнікаў, неаднаразовыя звароты на адрас прадпрыемства з просьбамі разлічыцца не прынеслі вынікаў. РБУ №132 пры гэтым тлумачыць затрымку выплаты адсутнасцю фінансавання з боку Міністэрства транспарту і камунікацый Рэспублікі Беларусь.
Таксама, паводле інфармацыі супрацоўнікаў, рахункі прадпрыемства заблакаваныя ў сувязі з прынятымі мерамі з боку падатковай і Фонду сацыяльнай абароны насельніцтва, што дадаткова ўскладняе выплаты па дагаворах падраду.
У відэа адзначаецца, што большасць работнікаў, якія засталіся без заробку, прысутнічала на выязным пасяджэнні на пачатку мая 2026 года на тэрыторыі рачнога порта «Рэчыца» пад кіраўніцтвам Сяргея Мацукова — намесніка міністра транспарту і камунікацый.
«Была адзначана праца РБУ, бо нашымі сіламі за 3,5 месяца была забяспечана тэхнічная гатоўнасць баржы Р0449 і завяршаўся рамонт баржы Р0461. Аднак выплат так і не было», — кажуць работнікі.
Паводле слоў аўтараў відэа, РБУ цяпер не можа назваць тэрміны пагашэння, бо яны самі чакаюць паступлення сродкаў.
Работнікі напісалі калектыўныя звароты ў Міністэрства працы і сацыяльнай абароны Беларусі, аднак гэта не дапамагло. У кастрычніку быў накіраваны калектыўны зварот у Адміністрацыю Аляксандра Лукашэнкі — гэта таксама не прынесла вынікаў.
«Несплата парушае нашы маёмасныя правы, паставіла нас у цяжкае матэрыяльнае становішча. Агульная сума запазычанасці на сёння складае больш за 180 тысяч беларускіх рублёў», — падсумоўваюць работнікі.