Генералы пачалі перадаваць Пуціну згенераваныя ШІ відэа пра «поспехі» ва Украіне
- 9.11.2026, 19:49
Дыктатар РФ жыве ў неіснуючай рэчаіснасці.
Кіраўніцтва расійскай арміі, верагодна, перадае Уладзіміру Пуціну фэйкавыя, згенераваныя штучным інтэлектам відэаролікі пра перамогі ва Украіне, якіх у рэчаіснасці не існуе, паведамляе Financial Times са спасылкай на крыніцы, блізкія да расійскага дыктатара.
Паводле суразмоўцаў FT, рашучасць Пуціна дамагчыся перамогі на полі бою падштурхоўвае генералаў раздуваць маштабы сваіх заваёў. «Калі нехта дакладвае, што ўзяў населены пункт, гэтым хвалісяцца перад палкоўнікам, той — перад генералам, генерал — перад генерал-лейтэнантам, той перадае ў Генштаб, а Генштаб — галоўнакамандуючаму. І пакуль усе яны паспеюць адрапартаваць, нашыя ўжо адступілі», — заявіў адзін з суразмоўцаў газеты.
Па яго словах, пасля гэтага прыходзяць загады атакаваць наступныя пазіцыі, заснаваныя на ілжывых дакладах пра захоп папярэдніх, хоць насамрэч войскаў РФ на іх няма. «З-за гэтага абодва бакі нясуць велізарныя страты. Вось чаму Сталін за такое расстрэльваў», — дадаў суразмоўца.
Як адзначае FT, колькасць фэйкавых ШІ-відэа пра захоп тых ці іншых населеных пунктаў ва Украіне ўжо ідзе на дзесяткі, і калі раней яны з’яўляліся ў Z-блогах, то цяпер сталі часткай афіцыйных зводак. У прыватнасці, у сярэдзіне кастрычніка Мінабароны РФ апублікавала кадры з салдатам, які размахвае расійскім трыкалорам з акна пашкоджанага будынка ў Добрапольлі, важным горадзе ў Данецкай вобласці. Гэтыя кадры, без сумневу, падвяргаліся мантажу, бо «сцяг на відэа рэзка змяняе сваё становішча», і гэта нельга растлумачыць наступствам сціскання файла або «шумамі» камеры, сказаў FT кіраўнік Conflict Intelligence Team Руслан Левіеў.
Аналітыкі ISW з чэрвеня па жнівень налічылі як мінімум 35 відэазапісаў, якія маглі быць сфабрыкаваныя з дапамогай ШІ, з якіх 10 вызначаныя як фэйкавыя з высокай ступенню верагоднасці. На такіх відэа зафіксаваныя байцы не менш як 10 палкоў і брыгад. Агульная колькасць падробленых запісаў, верагодна, вышэйшая, улічваючы абмежаванні наяўных праграм для выяўлення ШІ, адзначылі ў ISW.
Адзін з паказальных прыкладаў, што сведчыць пра тое, што Пуцін абапіраецца на ілжывую справаздачнасць, — гэта ШІ-фэйк з псэўдазахопам Святогорска, які абверглі — асабіста прыбылы ў горад камандуючы 3-м армейскім корпусам ЗСУ генерал Андрэй Білецкі, а таксама Z-супольнасць.
Расія, хутчэй за ўсё, працягне практыку фіктыўных дакладаў пра перамогі, лічыць Дара Масікот, старэйшая навуковая супрацоўніца Carnegie Endowment for International Peace. «Разрыў паміж заявамі (і рэчаіснасцю) павялічваецца. Крэмль не адчувае ніякага ўнутранага ціску, каб несці адказнасць за гэтыя сцверджанні», — адзначае яна.
У верасні з экранаў нацыянальнага тэлебачання Пуцін заяўляў, што яго армія з пачатку года захапіла 6,5 тысячы кв. км украінскай тэрыторыі, нагадвае FT. У рэальнасці падкантрольная РФ тэрыторыя ў лепшым выпадку павялічылася толькі на 1,5 тысячы кв. км, паводле ацэнак OSINT-аналітыкаў.
Калі ж улічыць землі, адваяваныя ўкраінскай арміяй, ад студзеня да кастрычніка ўключна «чысты» вынік расійскай арміі склаў усяго 119 кв. км захопленай тэрыторыі, паводле даных Інстытута вывучэння вайны (ISW).