У Кракаве адбудзецца Марш цішыні ў памяць пра ахвяр нападу

• 9.11.2026, 20:20

Удзел пацвердзілі прэзідэнт і прэм'ер-міністр Польшчы.

У панядзелак увечары, 9 лістапада, у Кракаве адбудзецца Марш цішыні, прысвечаны памяці загінулых падчас суботняга нападу на Галоўнай рыначнай плошчы. У мерапрыемстве возьмуць удзел прэзідэнт Польшчы Кароль Навроцкі і прэм'ер-міністр Дональд Туск.

Удзельнікі пачнуць збірацца а 20:00 на перакрыжаванні Галоўнай рыначнай плошчы і вуліцы Слаўкоўскай. Марш арганізавалі гарадскія ўлады пасля трагедыі. Яго мэта — ушанаваць памяць загінулых, выказаць салідарнасць з пацярпелымі і падтрымаць іх блізкіх, паведамляе Onet.

Прэм'ер-міністр Дональд Туск заклікаў жыхароў далучыцца да акцыі. «Сёння ў Кракаве а 20:00 давайце будзем усе разам», — напісаў кіраўнік урада ў сацыяльнай сетцы X. Пазней гарадскія ўлады пацвердзілі, што на запрашэнне мэра Кракава Лукаша Гібалы адгукнуліся і прэзідэнт, і прэм'ер-міністр.

Марш павінен насіць выключна сімвалічны і спакойны характар. У месцах, звязаных з трагедыяй, удзельнікі запаляць свечкі ў памяць пра загінулых. Паводле слоў мэра Кракава, падчас акцыі не плануецца выступаў — арганізатары хочуць сканцэнтравацца на памяці ахвяр і салідарнасці з іх сем'ямі.

Трагедыя адбылася ў суботу. Узброены мужчына адкрыў агонь па людзях у цэнтры Кракава. У выніку нападу загінулі шэсць чалавек, яшчэ 16 атрымалі параненні. Сярод пацярпелых былі двое паліцэйскіх. Сам нападнік памёр у бальніцы раніцай 9 лістапада.

У Кракаве абвешчаная жалоба, а ў сувязі з трагедыяй у краіне таксама дзейнічае нацыянальная жалоба. Расследаванне абставін нападу працягваецца. Следчыя вывучаюць, у прыватнасці, магчымыя матывы злачынцы і абставіны таго, што адбылося.

Яшчэ перад пачаткам Маршу цішыні на Галоўнай рыначнай плошчы пачалі збірацца жыхары Кракава і турысты. У горадзе людзі ўскладаюць кветкі і запальваюць свечкі ў памяць пра загінулых.