СМІ: Старэйшы брат Міхаіла Падаляка загінуў у Запарожскай вобласці

• 9.11.2026, 22:54

Ён ваяваў на баку Расіі.

Старэйшы брат дарадцы прэзідэнта Украіны Міхаіла Падаляка Уладзімір, верагодна, ваяваў у складзе расійскай арміі супраць Украіны. Ён загінуў у часова акупаванай Кірылоўцы Запарожскай вобласці ў маі 2024 года.

Новыя падрабязнасці яго смерці ўдалося ўстанавіць дзякуючы ўцечцы даных Расстата. Пра гэта 9 лістапада паведаміў праект Killed in Ukraine, перадае New Voice.

Пра гібель Уладзіміра Падаляка стала вядома яшчэ ў 2024 годзе. Тады OSINT-аналітыкі выявілі яго магілу, аднак абставіны смерці заставаліся невядомымі. На крыжы была ўказана дата — 19 мая 2024 года.

Згодна з данымі ўцечкі інфармацыі з Расстата, Уладзімір Падаляк памёр ад унутрычэрапнай траўмы, атрыманай падчас баявых дзеянняў у акупаванай Кірылоўцы.

На фота каля магілы ён адлюстраваны ў форме палкоўніка расійскай арміі. На грудзях бачны знак «За службу ў ваеннай выведцы», два ордэны Мужнасці і іншыя ўзнагароды. Побач з магілай таксама знайшлі вянок з надпісам «Ад калектыву ЦПС».

У Killed in Ukraine мяркуюць, што гаворка ідзе пра Цэнтр падрыхтоўкі спецыялістаў Галоўнага разведвальнага ўпраўлення Расіі.

Міхаіл Падаляк у каментары hromadske сказаў, што ў яго няма ніякіх даных пра смерць брата: «Мы ўвогуле не зносіліся дзесяцігоддзямі. Ніякіх камунікацый у любым выглядзе — ні наўпрост, ні праз пасярэднікаў, ні праз сваякоў. Ніколі не меў нічога агульнага з ім або яго сям'ёй».

У красавіку 2024 года Міхаіл Падаляк пацвердзіў, што яго старэйшы брат жыве ў Расіі. Пры гэтым ён падкрэсліў, што не кантактуе з сваяком і не нясе адказнасці за яго рашэнні.

Паводле слоў дарадцы прэзідэнта Украіны, брат пераехаў у Расію яшчэ за часоў СССР.