У Беларусі зноў забаранілі папулярную «незамярзайку»

• 10.02.2026, 12:04

Яна — расійскай вытворчасці.

Шклоамывальную вадкасць расійскага вытворцы забаранілі ўвозіць і прадаваць на тэрыторыі Беларусі.

Пра гэта паведамілі ў прэс-службе Мінскага абласнога цэнтра гігіены, эпідэміялогіі і грамадскага здароўя.

Такое рашэнне было прынята з-за неадпаведнасці прадукцыі Адзіным санітарна-эпідэміялагічным і гігіенічным патрабаванням па ўтрыманні метанолу.

У бліжэйшы час кіроўцы не ўбачаць на прылаўках «незамярзайку» SIBIRIA-30° вытворчасці расійскага ТАА «ФОРТУНА».

Пастанова эпідэміёлагаў уступіла ў сілу 9 лютага 2026 года.

Дарэчы, у Беларусі гэтую шклоамывальную вадкасць месяцам раней забараняў Дзяржстандарт, паводле інфармацыі БелТА.

«Вытворца наўмысна пазначыў асобныя ўласцівасці прадукцыі, але пры гэтым яна не можа быць ідэнтыфікаваная як прадукцыя, за якую яе выдаюць», — адзначылі тады ў ведамстве.

Вадкасць пачынала крышталізавацца пры −13±1,2 °С, што не дазваляе выкарыстоўваць яе пры тэмпературы навакольнага асяроддзя −30 °С, як пазначана вытворцам у маркіроўцы.