ЗСУ ліквідавалі хакеіста-акупанта з Гомеля
- 10.02.2026, 16:07
Да адпраўкі на вайну ён таксама служыў у спецназе ўнутраных войскаў Беларусі.
Канал расійскага разведвальнага батальёна «Разведосы» паведаміў пра гібель свайго байца па імені Мацвей з пазыўным Пупс. Прозвішча не ўказалі, але яго вызначыў «Флагшток» і высветліў, што загінулы — хакеіст з Гомеля.
Наёмніку было ўсяго 21 год, у яго засталіся мама, малодшая сястра і брат. Паводле інфармацыі канала разведвальнага батальёна, Мацвей служыў у разведгрупе. 4 лютага яна «выконвала задачу па выяўленні сховішчаў і зачыстцы бліндажоў праціўніка». У гэты час групу атакавалі ўдарныя FPV-дроны.
Заяўляецца, што «налёт варожых БПЛА быў адбіты, але група панесла страты параненымі байцамі». Пры эвакуацыі параненых, якіх суправаджаў Мацвей, быў здзейснены паўторны налёт. У батальёне заявілі, што баец прыкрываў групу і збіваў дроны з гладкаствольнай зброі, але адзін са збітых БПЛА ўпаў побач і здэтанаваў — раненні аказаліся несумяшчальныя з жыццём. Мацвея прадставілі да ўзнагароды «Ордэн мужнасці» пасмяротна.
Прыблізна ў той самы час пра «трагічную гібель» свайго гульца паведаміла хакейная каманда «Славяне», якая выступае ў аматарскай хакейнай лізе Гомеля. Абставіны гібелі не ўдакладняліся, але былі названыя імя і прозвішча загінулага — Мацвей Угараў. У камандзе ён быў варатарам.
Фотаздымкі з асабістай старонкі хлопца падобныя да апублікаваных разведвальным батальёнам. Сэрвісы пошуку па фота не знайшлі профіляў паводле здымка, у публічных спісах беларускіх наёмнікаў, якія публікавалі ўкраінскія крыніцы, гамяльчаніна таксама няма.
Але крыніца пацвердзіла «Флагштоку», што загінуў менавіта Мацвей Угараў, які жыў у Гомелі і гуляў у аматарскай камандзе. Таксама ён быў суддзёй, які працаваў на матчах дзіцячых каманд у Гомелі. Апошнім часам яго заўважалі ў гамяльскім Лядовым палацы ў вайсковай куртцы з наклееным шаўронам.
У каментарыях у ТГ да навіны пра гібель Мацвея нехта напісаў «Беларусь помніць», у каментары прыйшлі і сваякі загінулага. Іх словы прасякнутыя нянавісцю да ўкраінцаў, якіх называюць «бандэраўцамі», і заклікаюць «сцерці з твару зямлі». Сястра загінулага нават ужывала нецэнзурныя выразы і распавяла, што брата забілі ў дзень яе 17-годдзя і што ён быў яе адзінай апорай, абяцаў вярнуцца жывым. Абедзве заклікалі жорстка помсціць за загінулага родзіча.
У той жа час бабуля Галіна Ткачова звярнулася да камандзіраў, каб яны «адказалі за ўсё»:
«Моладзь ненавучаную адпраўляць у пекла, ведаючы, што яны не вернуцца… Нават калі Афган быў, маладых хлопцаў навучалі паўгода, як трымацца і каб выжыць, а вы ненавучаных і неабстраляных — на верную смерць…»
Магчыма, на рашэнне Мацвея адправіцца на вайну паўплывала «выхаванне» ў хакейнай камандзе «Славяне». Яе лагатып утрымлівае калаврат — старажытны сонечны сімвал, які пазней стаў асновай для нацысцкай свастыкі. Цяпер сімвал выкарыстоўваюць неаязычнікі і неанацысты, а сілавікі абмяжоўваюць яго выкарыстанне. На адным з фота ў пабліку каманды яна зафіксаваная пад лозунгам «За Беларусь», які з’яўляецца адным з лозунгаў беларускага рэжыму.
Па асабістай старонцы Угарава відаць, што ён захапляўся страйкболам і ў 2025 годзе ўдзельнічаў у ваенізаванай «Бітве гарадоў» у Бабруйску. У тым жа годзе апошні раз выклаў фота ў хакейнай форме. Паводле звестак Кіберпартызанаў, з 2023 па 2024 гады Угараў праходзіў службу ў мінскім спецназе — у в/ч 3214 (падраздзяленні ўнутраных войскаў).