У Беларусі правяраюць працу рынкаў

• 10.02.2026, 20:51

Зафіксавана мноства парушэнняў.

У лютым спецыялісты Міністэрства антыманапольнага рэгулявання і гандлю праводзілі праверкі на беларускіх рынках.

Паведамляецца, што кантралёры пабывалі на 11 рынках і пагутарылі больш як з двума сотнямі прадаўцоў.

Аднак вынікі праверак аказаліся далёка не найлепшымі — мноства парушэнняў.

Напрыклад, месцамі адсутнічала інфармацыя пра цэны на тавары, пра прадаўца, пералік абавязковых тавараў, звесткі пра аб’ект у Гандлёвым рэестры. Не выконваліся правілы размяшчэння і продажу нікацінаўтрымліваючай прадукцыі і іншае.

На Брэсцкім рынку індывідуальныя прадпрымальнікі прапаноўвалі да рэалізацыі забароненыя тавары: шакаладнае яйка Kinder Joy, шакалад Terravita і іншыя прысмакі з Польшчы.

На гандлёвых месцах Смаленскага рынку ў Віцебскай вобласці выяўлены тавары з мінулымі тэрмінамі прыдатнасці — сродкі абароны раслін, таматы.

На рынках «Давыдаўскі» і «Цэнтральны» (Гомельская вобласць) прапаноўваліся да рэалізацыі тавары, на якіх поўнасцю адсутнічала інфармацыя на рускай або беларускай мове.

Пры правядзенні маніторынгу на Цэнтральным рынку Гродзенскага аблспажыўтаварыства таксама знайшлі забароненыя кандытарскія вырабы.

А ў гандлёвым комплексе «Экспабел» пад Мінскам усталяваны факт продажу піратэхнічных вырабаў і забароненых да рэалізацыі тавараў — касметыка, піва. У гандлёвым доме «Ждановічы» ў Мінску таксама выяўлены забароненыя тавары ў выглядзе касметыкі.

На Цэнтральным рынку ў Магілёве выяўлены пратэрмінаваныя: чай, соусы і іншыя тавары.