Расія скінула бомбы на Славянск

• 11.02.2026, 7:51

Загінулі маці і дзіця.

Два чалавекі — жанчына і яе адзінаццацігадовая дачка — сталі ахвярамі расійскіх удараў па Славянску ў аўторак, 10 лютага. Гэта вынікае з паведамлення Данецкай абласной пракуратуры.

Колькасць параненых падчас гэтай атакі, паводле дадзеных ведамства на 14:00 па ўкраінскім часе, дасягнула 16 чалавек. Адзначаецца, што Узброеныя сілы РФ нанеслі ўдары па Славянску шасцю бомбамі «ФАБ-250» з УМПК (уніфікаваным модулем планавання і карэкцыі). Маецца на ўвазе расійскі навясны аэрадынамічны камплект з крыламі і спадарожнікавым навядзеннем, які ператварае звычайныя фугасныя авіябомбы (ФАБ) у кіраваныя плануючыя авіябомбы (КАБ).

Паводле даных паліцыі Данецкай вобласці, целы загінулай жанчыны і яе 11-гадовай дачкі дасталі з-пад завалаў. Сярод параненых — таксама як мінімум адно дзіця: сямігадовая дзяўчынка. «Разбурэнням падвергліся прыватныя дамы, станцыя тэхабслугоўвання (СТА), катэльня, нежылыя памяшканні», — гаворыцца ў паведамленні.

Раней кіраўнік Данецкай абласной дзяржаўнай адміністрацыі (АДА) Вадзім Філашкін паведаміў, што сярод параненых — мужчына 1980 года нараджэння, які знаходзіцца ў цяжкім стане. «Паводле папярэдніх падлікаў, пашкоджаныя: 14 прыватных дамоў, дзве шматпавярхоўкі, адміністрацыйны будынак, склады і ангары, інфраструктурны аб’ект, крама, СТА, запраўка і 28 аўтамабіляў», — напісаў чыноўнік.