Стала вядома, куды накіраваліся высланыя з Еўропы расійскія шпіёны
- 11.02.2026, 8:27
З'явіўся даклад разведкі Эстоніі.
Расія масава накіроўвае ў краіны Афрыкі супрацоўнікаў спецслужбаў, дыпламатаў і сваіх агентаў, якія сталі персонамі нон грата ў Еўропе.
Пра гэта паведамляе Служба знешняй разведкі Эстоніі (EFIA) ў дакладзе за 2026 год.
У дакладзе гаворыцца, што, накіроўваючы сваіх супрацоўнікаў у Афрыку, Расія не толькі ўзмацняе сваю прысутнасць на кантыненце, але і вырашае ўнутраную кадравую праблему.
Толькі за апошняе дзесяцігоддзе з-за агрэсіўнай палітыкі Масквы і шпіёнскай дзейнасці заходнія краіны выслалі сотні расійскіх дыпламатаў і закрылі шэраг кансульстваў. На гэтым фоне ўмацаванне сувязяў з Афрыкай дазваляе Крамлю працаўладкоўваць дзяржаўных службоўцаў, якія страцілі магчымасць працаваць у ЕС.
Акрамя традыцыйнага ваеннага супрацоўніцтва, Расія актыўна прасоўвае на кантыненце інструменты «мяккай сілы» — праз адукацыйныя і культурныя праграмы.
У прыватнасці, як гаворыцца ў дакладзе, федэральнае агенцтва «Россотрудничество», якое адыгрывае ключавую ролю ў аперацыях дзяржаўнага ўплыву, пашырае сетку прадстаўніцтваў у Афрыцы. Новыя офісы адкрыты, у прыватнасці, у Гвінеі і Буркіна-Фасо.
Таксама фонд «Русский мир», які займаецца папулярызацыяй рускай мовы за мяжой, адкрыў новыя цэнтры ў Бурундзі і Угандзе.
Паводле ацэнкі эстонскай разведкі, праз гэтыя структуры Масква распаўсюджвае антызаходнія наратывы, называючы палітыку Захаду «неакаланіяльнай і патэрналісцкай». Затое Расія пазіцыянуе сябе як «чэмпіёна шматпалярнага сусветнага парадку» і «абаронцу суверэнітэту», прапаноўваючы супрацоўніцтва нібыта на аснове раўнапраўнага партнёрства.
Афрыканскія студэнты едуць на вайну ва Украіну
Асобная ўвага ў дакладзе нададзена выкарыстанню афрыканскіх студэнтаў у вайне супраць Украіны. Паводле дадзеных EFIA, у 2025 годзе ў расійскіх універсітэтах навучаліся каля 35 тысяч студэнтаў з Афрыкі. Расійскія ўлады, як сцвярджаецца, карыстаюцца іх складаным фінансавым становішчам, ставячы перад выбарам — дэпартацыя або падпісанне кантракта з Мінабароны РФ.
У выніку, паводле інфармацыі эстонскай службы, сотні грамадзян Замбіі, Танзаніі, Гвінеі, Камеруна, Эрытрэі, Нігерыі і іншых краін былі адпраўленыя на вайну супраць Украіны.