У Смалявічах трэці тыдзень пасярод вуліцы б'е фантан гарачай вады

• 11.02.2026, 12:10

У ЖКГ распавялі, чаму нічога з ім не робяць.

На вуліцы 50 гадоў Кастрычніка ў Смалявічах ужо тры тыдні з зямлі б'е фантан гарачай вады. У ЖКГ мясцоваму дзяржаўнаму выданню Smolevichi-24.by распавялі, чаму дагэтуль не ліквідавалі камунальную аварыю.

Прычынай інцыдэнту стала трэшчына на трубаправодзе з гарачай вадой, які выкарыстоўваецца для ацяплення.

Камунальнікі раскопалі ўчастак, устанавілі рамонтны хамут, але цалкам спыніць працяканне не ўдалося.

Для ліквідацыі трэшчыны неабходна цалкам адключыць і зліць участак цеплатрасы. Рабіць гэта ў маразы надзвычай рызыкоўна — пяць дамоў і школа могуць хутка астынуць.

— Каб не адключаць людзей ад ацяплення і гарачай вады, мы цяпер рамонт не праводзім, — адзначылі ў ЖКГ.

Нагадаем, у студзені ў розных рэгіёнах Беларусі здараліся аварыі ў сістэме ацяплення.