Беларус наладзіў у Польшчы вытворчасць хатніх бункераў

• 11.02.2026, 14:05

За 4 690 еўра прапануецца падземная капсула выжывання на два—тры месцы.

Беларускі бізнесмен Аляксандр Фурсевіч, які ў 2017 годзе заснаваў у Варшаве кампанію BPR-Plastech, асвойвае новую нішу на еўрапейскім рынку — вытворчасць прыватных падземных сховішчаў, піша тэлеграм-канал Вадзіма Сеховіча.

Акрамя фірмовых садовых паграбоў для захоўвання прадуктаў, бізнесмен цяпер прапануе і падземныя бункеры, у якіх разам з неабходным запасам ежы можа на пэўны час і даволі камфортна схавацца яго ўладальнік разам з сям'ёй.

У прэзентацыі на сайце BPR-Plastech сказана, што такое сховішча прызначана для абароны ад найбольш верагодных пагроз — ад уламкаў беспілотнікаў або ракет, што падаюць, ад абломкаў разбураных будынкаў ці выпадковых стрэлаў. Цэны на бункеры беларуса знаходзяцца ў межах 13,7 тыс. — 18,5 тыс. еўра. За 4 690 еўра прапануецца падземная капсула выжывання на два—тры месцы, але за такую цану — без месца для запасаў ежы.

Паграбы рэалізуюцца пад брэндам Natural Fridge (іх кошт — ад 2 тыс. да 14 тыс. еўра) і, як указваецца на сайце, ужо знайшлі больш за 800 пакупнікоў у Польшчы, Германіі, Швейцарыі і Аўстрыі.