Ілон Маск хоча пабудаваць завод на Месяцы

• 11.02.2026, 14:33

На спадарожніку Зямлі з’явіцца поўнацэнны горад.

Мільярдэр Ілон Маск заявіў супрацоўнікам сваёй кампаніі xAI, што плануе стварыць на Месяцы завод для зборкі спадарожнікаў штучнага інтэлекту, а таксама гіганцкую катапульту — так званы мас-драйвер — для вывядзення гэтых спадарожнікаў у космас. Пра гэта стала вядома з запісу агульнай нарады кампаніі, піша The New York Times (пераклад — сайт Charter97.org).

Паводле слоў Маска, такі месяцовы комплекс дазволіць xAI атрымаць магутнасць, недаступную канкурэнтам, і паскорыць развіццё перадавых сістэм ШІ. «Трэба ісці на Месяц», — падкрэсліў ён, дадаўшы, што за інтэлектам такога маштабу будзе «неверагодна цікава назіраць».

Тыднем раней Маск абвясціў пра зліццё xAI са SpaceX, каб спрасціць стварэнне дата-цэнтраў ШІ ў касмічнай прасторы. Цяпер яго планы пашырыліся да будаўніцтва месяцовага аб’екта, хаця канкрэтных тэхнічных падрабязнасцяў ён не прывёў.

Інтарэс Маска да Месяца — адносна новы паварот. Раней ён дзесяцігоддзямі казаў, што галоўная мэта SpaceX — каланізацыя Марса. Аднак цяпер мільярдэр усё часцей узгадвае Месяц як першы крок. Спачатку «самадастатковы горад на Месяцы», потым Марс і ў перспектыве — даследаванне іншых зоркавых сістэм.

Падчас сустрэчы Маск таксама абмеркаваў праект X (былы Twitter), заявіўшы, што ў платформы каля 600 млн актыўных карыстальнікаў у месяц. Ён паведаміў, што новыя функцыі — уключаючы банкаўскі сэрвіс X Money і асобнае чат-прыкладанне — павінны павялічыць штодзённую аўдыторыю да больш чым мільярда.

Маск вядомы празмерна аптымістычнымі прагнозамі. Місія SpaceX на Марс, абяцаная ім у 2016 годзе, дагэтуль не адбылася. Але ён сцвярджае, што xAI «рухаецца хутчэй за ўсіх» і рыхтуецца да далейшага росту і перабудовы структуры кампаніі.