Беларус больш за паўтара года чакаў у чарзе на нямецкі шэнген
- 11.02.2026, 20:28
Шмат каго здзівіла, на які тэрмін была выдадзена віза.
У Threads кампаніі @maxxtour.by, якая дапамагае беларусам атрымліваць візы, распавялі гісторыю кліента, які падаваўся на нямецкі шэнген. У спіс чакання чалавек запісаўся ў жніўні 2024-га, чарга несці дакументы дайшла толькі праз паўтара года — у студзені 2026-га. Але яшчэ больш некаторых здзівіла тое, на які тэрмін была выдадзена віза. Іншыя прыйшлі да высновы, што і гэтаму варта радавацца, перадае «Зеркало».
Паводле дадзеных кампаніі, на нямецкі шэнген чалавек падаваўся ўпершыню. У яго было «неафіцыйнае запрашэнне», то-бок не аформленае на бланку, а проста напісанае ад рукі. Склалі яго сябры, удакладнілі прадстаўнікі фірмы ў каментарыях. У спісе чакання чалавек знаходзіўся амаль паўтара года. Дакументы яму трэба было падаваць 27 студзеня 2026-га. Візу выдалі на 30 дзён. З 29 чэрвеня па 28 ліпеня.
— Для нас гэта не было шокам, жосцю і нечым у тым жа родзе, — адзначылі ў кампаніі.
Паводле іх слоў, да моманту падачы яны ўжо разумелі статыстыку выдачы віз, таму чакалі падобнага выніку.
— Плюс [нямецкая] віза даступная ў плане запісу для любога чалавека, без ботаў і неабгрунтаванага цэнніка на рынку. Віза ёсць, і гэта [выдатна], — адзначылі ў фірме.
За суткі пост карыстальніка @maxxtour.by паглядзелі больш за 80 тысяч разоў, пад ім — звыш 160 каментарыяў. У іх многія дзеліліся сваімі гісторыямі атрымання нямецкага шэнгену. Прывядзём некаторыя з такіх гісторый:
«Па афіцыйным запрашэнні дачка чакала год і чатыры месяцы. У верасні атрымала [візу] на пяць гадоў».
«Чакалі паўтара года, чыстыя пашпарты, неафіцыйнае запрашэнне. [Вынік] — тры месяцы, або 90 дзён. Мы задаволеныя».
«Нашым сябрам далі на 12 дзён, запіс чакалі амаль год, першая нямецкая віза».
«17 месяцаў чакалі, неафіцыйнае запрашэнне, далі на год усёй сям'і. Да гэтага рабіла [таксама] у нямецкім [консульстве]. [Быў] першы раз, турызм, і таксама далі на год усім (была толькі бронь гатэля і даныя на аўто для выезду сваім ходам)».
«Чаканне — паўтара года, афіцыйнае запрашэнне ад сяброў. Далі візу дакладна на тэрмін першага ўезду, які ўказалі ў анкеце. На 28 дзён».
«Пакуль немцаў чакаю, ужо паспеў з трэцяга разу ў італьянцаў на два гады [візу] атрымаць …>».
У каментарыях адзін з карыстальнікаў напісаў, як, запісаўшыся ў спіс на падачу на нямецкі шэнген, апынуўся ў непрыемнай сітуацыі.
— Я стаў у чаргу ў студзені 2024-га, і чарга проста знікла, ніхто не ведае [куды]. Адказ: «Станавіцеся нанова», — паскардзіўся мужчына.
— У нас таксама ёсць такія выпадкі: у верасні 2025-га быў запіс — і яго выдалілі, — падзяліліся сваім досведам у кампаніі maxxtour.by.
Дзе беларусам прасцей за ўсё атрымаць візу
У канцы студзеня тэлеграм-канал «Візавы крот» апублікаваў свой рэйтынг краін, дзе беларусам ахвотней за ўсё даюць шэнген. Традыцыйна першае месца ў ім займае Іспанія.
— З добрага: адмоваў няшмат, тэрміны разгляду — у межах двух тыдняў.
Вынік той жа: пад даты паездкі, [на] месяц [ці] тры. На большае разлічваць не варта. Даты [на запіс на падачу] да іспанцаў з'яўляюцца прыкладна раз на два тыдні, — піша тэлеграм-канал.
На другім месцы — Італія: запісацца на падачу ў візавы цэнтр гэтай краіны ўсё яшчэ складана, але калі атрымаецца, вынік акупіцца.
— У выніку самыя ўдачлівыя атрымліваюць візы на год, два, тры, — адзначае «Візавы крот».
Трэцяе месца ў гэтым рэйтынгу займае Францыя, далей ідуць Венгрыя, Грэцыя, Германія, Балгарыя, Румынія.