WJS: Пентагон рыхтуе другую авіяносную групу да вайсковай аперацыі супраць Ірана

• 11.02.2026, 23:54

Яе разгорнуць на працягу пары тыдняў.

Пентагон плануе накіраваць другую авіяносную ўдарную групу амерыканскіх ВМС на Блізкі Усход. Пра гэта паведамляе выданне The Wall Street Journal са спасылкай на трох неназваных амерыканскіх чыноўнікаў. Паводле звестак выдання, амерыканскія вайскоўцы рыхтуюцца да магчымай аперацыі супраць Ірана.

Крыніцы WSJ падкрэслілі, што прэзідэнт ЗША Дональд Трамп яшчэ не аддаў афіцыйны загад аб разгортванні, і планы могуць змяніцца. Авіяносец USS George H.W. Bush цяпер завяршае вучэнні каля берагоў Вірджыніі. У выпадку разгортвання ён далучыцца да USS Abraham Lincoln, які ўжо знаходзіцца ў рэгіёне.

Адзін з чыноўнікаў паведаміў, што ваеннае ведамства рыхтуе авіяносец да разгортвання праз два тыдні. Іншая крыніца заявіла, што загад аб перадыслакацыі могуць аддаць на працягу некалькіх гадзін.

10 лютага Дональд Трамп у інтэрв'ю выданню Axios заявіў, што можа накіраваць другую авіяносную ўдарную групу на Блізкі Усход для гатоўнасці да ваенных дзеянняў з Іранам, калі Вашынгтону не ўдасца дасягнуць пагаднення з Тэгеранам.