Расія вырашыла аднавіць больш за 20 000 бомбасховішчаў
- 12.02.2026, 4:21
Крэмль гатоўіцца да магутных удараў ЗСУ?
МЧС Расіі цяпер займаецца аднаўленнем больш за 20 тысяч абарончых збудаванняў у 82 рэгіёнах краіны. Пра гэта паведаміў кіраўнік ведамства Аляксандр Курэнкоў на пашыраным пасяджэнні выніковай калегіі МЧС. У 45 суб'ектах, паводле яго слоў, зацверджаны планы гатоўнасці сістэм апавяшчэння. Адрасы сховішчаў і пунктаў эвакуацыі размешчаныя на партале «Госуслуги». Там жа апублікаваная інфармацыя пра пункты эвакуацыі, куды грамадзянам неабходна прыбыць пры абвяшчэнні адпаведных мерапрыемстваў.
Да маштабнай рэканструкцыі і мадэрнізацыі савецкіх сховішчаў расійскія ўлады прыступілі толькі ў канцы мая 2025 года. Тады Аляксандр Курэнкоў патлумачыў неабходнасць тэрміновага аднаўлення сістэмы грамадзянскай абароны «ўсё большай актуальнасцю» ў умовах развязанай Уладзімірам Пуціным вайны з Украінай. На гэтыя мэты, паводле ацэнак МЧС, спатрэбіцца каля 155 мільярдаў рублёў.
Згодна з данымі МЧС за 2022 год, амаль 67% сховішчаў і супрацьрадыяцыйных укрыццяў па ўсёй краіне прызнаныя цалкам непрыдатнымі да эксплуатацыі. Толькі 16% здольныя эфектыўна абараніць грамадзян у выпадку абстрэлаў або ядзернай пагрозы, яшчэ 17% — часткова гатовыя да выкарыстання.
Падчас праверак у непрыдатных і часткова прыдатных укрыццях фіксавалі затапленні, разбурэнні нясучых канструкцый, згнілыя элементы, цвіль і іржу, выбітыя дзверы і вокны. Нярэдка адсутнічалі водазабеспячэнне, каналізацыя і электрычнасць, а ўваходы аказваліся заваленыя зямлёй, смеццем або староннімі прадметамі.
На фоне пачашчаных праверак у 2024 годзе рэзка ўзрасла колькасць адміністрацыйных спраў, звязаных з нездавальняючым станам сховішчаў. Па артыкуле 20.7 КоАП (парушэнне патрабаванняў грамадзянскай абароны) у 2024 годзе суды ў Расіі і анексаваным Крыме разгледзелі рэкордную колькасць іскаў — 200. Гэта ўдвая перавышае паказчык 2021 года і ў чатыры разы — 2020-га. Пратаколы выпісваюць у дачыненні да ўладальнікаў і арандатараў будынкаў, дзе размешчаныя такія аб’екты.