Генштаб ЗСУ: ракеты «Фламінга» паразілі адзін з найбуйнейшых арсеналаў Мінабароны РФ

• 12.02.2026, 13:21

Сталі вядомыя падрабязнасці ўдараў па Валгаградскай і Тамбоўскай абласцях.

Сілы абароны ў ноч на чацвер, 12 лютага, паразілі арсенал комплекснага захоўвання ракет, боепрыпасаў і выбуховых рэчываў Галоўнага ракетна-артылерыйскага ўпраўлення Мінабароны РФ у Валгаградскай вобласці.

Пра гэта паведамілі у Генеральным штабе ЗСУ.

Як адзначылі вайскоўцы, гэты арсенал з'яўляецца адной з найбуйнейшых пляцовак для захоўвання боепрыпасаў расійскай арміі. Украінскія вайскоўцы наняслі ўдары па аб'екце сродкамі далёкага паражэння FP-5 «Фламінга». Зафіксаваныя моцныя выбухі на тэрыторыі аб'екта з наступнай другаснай дэтанацыяй.

Акрамя гэтага, у населеным пункце Мічурынск (Тамбоўская вобласць, РФ) вайскоўцы атакавалі прадпрыемства па вытворчасці высокатэхналагічнага абсталявання для авіяцыйных і ракетных сістэм — Мічурынскі завод «Прагрэс», які задзейнічаны ў забеспячэнні расійскай арміі. Як адзначылі ў Генштабе, на тэрыторыі завода ўзнік пажар, вынікі і маштаб нанесенай шкоды ўдакладняюцца.

Таксама ў раёне Цярпенне і Розаўкі на акупаванай тэрыторыі Запарожскай вобласці паражаныя склады боепрыпасаў акупантаў. Вайскоўцы пацвердзілі і паражэнне 11 лютага завода «Валгаградскі» ў Валгаградскай вобласці РФ.

Там пашкоджаная асноўная ўстаноўка першаснай перапрацоўкі нафты ЭЛОУ-АВТ-1, пашкоджаныя элементы АВТ-3 і інфраструктурныя аб'екты на тэрыторыі. На іншых аб'ектах, у прыватнасці другаснай перапрацоўкі, зніжана нагрузка або адбылося спыненне.

У ноч на 12 лютага у Валгаградскай вобласці РФ прагрымеў шэраг магутных выбухаў. Паведамлялася пра ракетны ўдар і пажар на ваенным арсенале ў пасёлку Катлубань. Губернатар Валгаградскай вобласці Андрэй Бочараў заявіў, што мясцовая СПА ўначы нібыта адбіла ракетную атаку. У той жа час, паводле яго слоў, у выніку «падзення абломкаў на тэрыторыі аб'екта міністэрства абароны каля пасёлка Катлубань адбылося ўзгаранне».