Кім Чэн Ын рыхтуе непаўналетнюю дачку да ролі пераемніцы

• 12.02.2026, 14:10

Разведка Паўднёвай Карэі даведалася падрабязнасці.

Паўночнакарэйскі дыктатар Кім Чэн Ын плануе зрабіць сваёй пераемніцай дачку Кім Чу Е. Дзяўчынка нарадзілася ў 2013 годзе.

Пра гэта паведамляе Yonhap.

Паводле даных разведкі Паўднёвай Карэі (NIS), прыкметы актыўнага ўдзелу Чу Е ў дзяржаўных мерапрыемствах, у прыватнасці — у святкаванні гадавіны заснавання Карэйскай народнай арміі і ў візіце ў Кымсусанскі палац Сонца, сведчаць пра яе выхад на стадыю «прызначэння пераемніцай».

Раней дзяўчынку лічылі «найбольш верагоднай пераемніцай».

«Паколькі Кім Чу Е дэманстравала прысутнасць на ключавых мерапрыемствах і выказвала сваё меркаванне адносна дзяржаўнай палітыкі, NIS лічыць, што яна цяпер увайшла ў стадыю прызначэння пераемніцай», — гаворыцца ў артыкуле.

Агенцтва таксама паведаміла, што будзе сачыць за ўдзелам Чу Е ў маючым адбыцца партыйным з'ездзе ў канцы лютага.

У выпадку яе з'яўлення або надання афіцыйнага тытула спекуляцыі адносна пераемнасці могуць узмацніцца.

Паводле разведкі, дачка дыктатара КНДР нарадзілася ў 2013 годзе.