ЦРУ рассакрэціла інфармацыю пра «атаку НЛА на расійскіх вайскоўцаў»

• 12.02.2026, 17:15

Нібыта акамянелі 23 салдаты.

Адзін з самых дзіўных эпізодаў, звязаных з НЛА, адбыўся на тэрыторыі Расіі. Рассакрэчаны файл ЦРУ змяшчае інфармацыю пра тое, што ў 1993 годзе расійскія салдаты ў Сібіры збілі невядомы лятальны аб’ект ракетай класа «зямля–паветра», піша Daily Express (пераклад — сайт Charter97.org).

Як гаворыцца ў дакументах, з знішчанага апарата выйшлі пяць істот, якія потым зліліся ў ззяючую сферу. Яна, як паведамлялася, выпусціла промень, які імгненна ператварыў 23 вайскоўцаў у каменныя слупы. Выжылі толькі двое, якія знаходзіліся далей за астатніх.

Хоць афіцыйна СССР называў паведамленні пра кантакты з іншапланецянамі заходняй прапагандай, новыя рассакрэчаныя дакументы паказваюць, што савецкія спецыялісты ўсё ж фіксавалі і даследавалі «анамальныя атмасферныя з’явы» ў 1970–80-х гадах.

У архівах згадваецца і іншае незвычайнае назіранне — велізарны аб’ект «у форме медузы», які вісеў больш за гадзіну над горадам Нальчыкам 13 лютага 1989 года.

Найбольш сенсацыйны эпізод — напад на нізкалятучы «лятаючы дыск» у Сібіры — у афіцыйных дакументах не фігуруе, аднак сцвярджаецца, што рэшткі НЛА і акамянелыя салдаты былі дастаўленыя ў сакрэтны навуковы цэнтр пад Масквой. Там нібыта ўстанавілі, што целы ператварыліся ў рэчыва, падобнае да вапняку.

ЦРУ, хоць і ўключыла гэтыя звесткі ў свае рассакрэчаныя архівы, не праводзіла расследавання і не пацвярджала выкладзеныя звесткі.