Кітай наладзіў кантрабанду заходніх аўтамабіляў у Расію

• 12.02.2026, 19:23

Аўтамабілі рэгіструюць «з прабегам нуль кіламетраў».

Нягледзячы на санкцыі Захаду і Азіі, уведзеныя пасля ўварвання Расіі ва Украіну, дзесяткі тысяч замежных аўтамабіляў працягваюць трапляць на расійскі рынак праз Кітай паводле шэрых схем. Пра гэта сведчаць даныя расійскай кампаніі Autostat і інтэрв'ю ўдзельнікаў рынку, праведзеныя агенцтвам Reuters (пераклад — сайт Charter97.org).

Ідзе пра аўтамабілі ад Toyota, Mazda, а таксама пра нямецкія прэміяльныя брэнды. Большая частка такіх аўто або вырабляецца ў Кітаі, дзе знаходзяцца сумесныя заводы міжнародных канцэрнаў, або адпраўляецца туды транзітам пасля зборкі ў іншых краінах. Затым аўтамабілі афармляюцца як «з прабегам нуль кіламетраў» — фактычна новыя машыны рэгіструюцца ў Кітаі як прададзеныя, пасля чаго перапрадаюцца ў Расію ўжо пад выглядам ужываных.

Гэтая схема дазваляе зняць неабходнасць атрымліваць дазвол аўтавытворцаў на экспарт у Расію, тлумачыць былы экспарцёр з Сычуані Чжан Ай Цзюнь: «Так экспартаваць прасцей». У Кітаі такія аўтамабілі прадаюцца са зніжкамі, але ў Расіі каштуюць амаль як новыя.

Паводле даных Autostat, Кітай стаў ключавым каналам паставак іншамарак у Расію. У 2025 годзе амаль палова з 130 тысяч прададзеных у краіне аўтамабіляў заходніх і японскіх брэндаў была выраблена ў Кітаі. З моманту пачатку вайны Расія імпартавала больш за 700 тысяч такіх аўтамабіляў.

Пры гэтым самі аўтаканцэрны сцвярджаюць, што поўнасцю спынілі пастаўкі. BMW, Mercedes-Benz і Volkswagen заяўляюць, што строга забараняюць продаж у Расію і спрабуюць спыняць шэры экспарт, аднак прызнаюць, што расследаваць парушэнні складана. Toyota і Mazda таксама сцвярджаюць, што даўно не адпраўляюць машыны ў Расію, а аўто, якія трапляюць на рынак, — прадукцыя, перапраданая трэцімі асобамі.

Эксперты адзначаюць, што цалкам заблакаваць такія схемы практычна немагчыма. «Існуе занадта шмат спосабаў абыходзіць санкцыі», — кажа еўрапейскі юрыст Себасцьян Беннінк.